Во репортажата на „360 степени“ пред три години од Министерството за животна средина тогаш рекоа дека има количина од 10 илјади тони во малата депонија, а во големата депонија, пак, вкупно околу 25 до 30 илјади тони ваков отпад
Министерот за животна средина и просторно планирање Насер Нуредини денес го потпиша Решението за одобрување на Планот за ремедијација на локалитетот на ОХИС АД Скопје, со што ќе можат да започнат активностите за отстранување на линданот и на почвата контаминирана со линдан од малата депонија.
Ова вчера го побара Владата откако од агенцијата на ОН – УНИДО стигнала потврда дека е прифатен планот на фирмата „Полиеко“, избрана на меѓународен тендер за чистење и ремедијација на малата депонија со опасниот историски отпад линдан, како и за дефинирање на временската рамка на изведбените работи.
Од Министерството велат дека во постапка е издавање на две дозволи за извоз на овој опасен отпад, согласно Базелска конвенција: за во Франција каде што ќе се извезе линданот и за во Холандија каде што ќе се извезе контаминираната земја под линданот, а процесот на отстранување на дел од малата депонија се очекува да заврши до почетокот на наредната годината доколку дозволат условите со пандемијата, при што би се отстраниле првите количини (околу 700 тони) на почва контаминирана со HCH и чист HCH-отпад.
Илјадници тони токсичен отпад се депонирани во дворот на ОХИС, остаток од производството на пестицидот линдан, кој се правел во фабриката. Меѓу токсичните супстанции, има и значителни остатоци линдан, кој од 2009-та е забранет за производство. Речиси една деценија подоцна, Македонија сѐ уште бара начин како најбезболно да ја затвори оваа отворена рана.
Линданот е пестицид, кој порано се користел во земјоделството. Белиот прашок служел како инсектицид, а со неговото одвојување од другите соединенија се создала огромна количина токсичен отпад кој се депонирал на отворено.
Иако затрупани, смртоносните супстанции во ОХИС се сметаат за најжешка еколошка точка во Македонија.
Земјата со која е покриен отпадот, не претставува никаква заштита, туку напротив се контаминирала од отровите и така се создала уште поголема маса од четириесет илјади тони опасни супстанции кои со децении се оставени на отворено. Со текот на времето бетонските базени распукале, па со линдан се контаминирале и подземните води.
Во репортажата на „360 степени“ пред три години, од Министерството за животна средина рекоа дека за да се деконтаминира количина од 10 илјади тони што е количина на малата депонија, прогнозата е дека се потребни околу пет години. За големата депонија, пак, со вкупно околу 25 до 30 илјади тони приближно би требало уште двапати по толку.
Со потпишување на Стокхолмската конвенција во 2004-та, во која линданот како токсична супстанција е додаден во 2009-та, Македонија e обврзана да ја деактивира темпираната бомба во својот двор.