Со потпишување на Стокхолмската конвенција во 2004-та, во која линданот како токсична супстанца е додаден во 2009-та, Македонија e обврзана да ја деактивира темпираната бомба во својот двор
Владата го задолжи Министерството за животна средина да донесе решение за одобрување на планот за конечна деконтаминација на линданот во кругот на фабриката АД „ОХИС“-Скопје.
Оваа одлука следува откако Агенцијата за индустриски развој на ОН, УНИДО го информираше Министерството дека е одобрен планот од грчката компанија специјализирана за овој тип активности „Polyeco“ за спроведување на постапката за деконтаминација на почвата во АД „ОХИС“- Скопје.
Темпирана бомба
Илјадници тони токсичен отпад се депонирани во дворот на ОХИС, остаток од производството на пестицидот Линдан, кој се правел во фабриката. Меѓу токсичните супстанци, има и значителни остатоци линдан, кој од 2009-та е забранет за производство. Речиси една деценија подоцна, Македонија се уште бара начин како најбезболно да ја затвори оваа отворена рана.
Линданот е пестицид, кој порано се користел во земјоделството. Белиот прашок служел како инсектицид, а со неговото одвојување од другите соединенија се создала огромна количина токсичен отпад кој се депонирал на отворено.
Иако затрупани, смртоносните супстанции во ОХИС се сметаат за најжешка еколошка точка во Македонија.
Земјата со која е покриен отпадот, не претставува никаква заштита, туку напротив се контаминирала од отровите и така се создала уште поголема маса од четириесет илјади тони опасни супстанци кои со децении се оставени на отворено. Со текот на времето бетонските базени распукале, па со линдан се контаминирале и подземните води.
Од севкупиот отпад во ОХИС, канцерогениот линдан е присутен со речиси 10 отсто. Високо токсични се и останатите 90 отсто од отпадните супстанции, кои се сметаат за потенцијално-канцерогени.
Во репортажата на „360 степени“ пред три години, од Министерството за животна средина рекоа дека за да се деконтаминира количина од 10 илјади тони што е количина на малата депонија, прогнозата е дека се потребни околу пет години. За големата депонија, пак, со вкупно околу 25 до 30 илјади тони отприлика би требало уште двапати по толку.
Со потпишување на Стокхолмската конвенција во 2004-та, во која линданот како токсична супстанца е додаден во 2009-та, Македонија e обврзана да ја деактивира темпираната бомба во својот двор.
Во продолжение може да ја погледнете репортажата на „360 степени“ од 2018 година.