Дел од броилата се т.н. паметни броила, тие ќе ги смениме преку ноќ и веќе од 1 декември околу 200 илјади корисници ќе имаат веќе нагодени тарифи, а другите би биле во текот на месецот. Нагодувањето многу ќе зависи од потрошувачите и достапноста на броилата, велат од „Електродистрибуција“
До крајот на годината сите достапни броила ќе бидат нагодени да пресметуваат евтина дневна тарифа за електрична енергија, велат од „Електродистрибуција“. Според информациите од компанијата, при крај се подготовките и до 1 декември годинава се ќе биде подготвено за воведување евтина дневна тарифа на електричната енергија.
„Дел од броилата се т.н. смарт броила, тие ќе ги смениме преку ноќ и веќе од 1 декември околу 200 илјади корисници ќе имаат веќе сетирани тарифи, а другите би биле во текот на месецот. Многу ќе зависи од потрошувачите и достапноста на броилата“,
рече менаџерот на „Електродистрибуција“, Сашо Салтировски, во одговор на новинарско прашање при денешната посета на министерот за економија Крешник Бектеши на подружницата на „ЕВН Македонија“ во Бутел заедно со директорот на Бирото за метрологија Авдуљ Сељам Селами.
Салтировски вели дека нагодувањето на броилата се прави при нивното читање и затоа побара од граѓаните тие да им бидат достапни на нивните читачи.
„Сите оние броила што ќе бидат достапни ќе бидат сетирани во текот на декември, а колку вкупно броила ќе бидат сетирани ќе зависи од достапноста на броилата. Сите броила што се достапни ги читаме еднаш месечно и сите тие ќе бидат сетирани, бидејќи тоа оди оптички со еден уред се оди од броило до броило и при читањето софтверот ги сетира како што треба да се сетира“,
додаде Салтировски.
Салтировски укажа дека во оние домови и викенд куќи во кои броилата се затворени нема да може да се нагодат.
„Ако луѓето се на работа, а не се дома, а броилото е внатре не можеме да го сетираме“,
рече Салтировски.
Според него, во Арачиново, кое изминативе години беше еден од најголемите неплаќачи на струја, броилата се веќе извадени на улица, загубите во јуни и јули се сведени на 10 проценти, што, како што рече Салтировски, се смета за техничка загуба и кај нив нагодувањето за евтината денеска тарифа ќе биде веднаш направено.
Министерот Бектеши потсети дека одлуката за воведување на евтина дневна тарифа на електричната енергија ја носи Регулаторната комисија за енергетика (РКЕ) кое е независно тело.
„Воведувањето на дневна евтина тарифа е поврзано со производството, со капацитетот на ЕСМ за да произведува струја во тие пикови. Согласно анализите кои се направени одлучивме сите заедно евтина дневна тарифа да биде воведена на 1 декември. Ги повикуваме сите граѓани кои сакаат да имаат евтина дневна тарифа од 1 декември да им дозволат пристап на службите на ЕВН до броилата за да можат да интервенираат. Ако броилото не е достапно тоа ќе биде сетирано од наредниот месец“,
рече Бектеши.