Правосудството како столб со висок ризик од коруптивни и други влијанија ќе биде дел од Годишниот план за следење на имотната состојба и судирот на интереси за 2020 година, потврди денеска претседателката на Државната комисија за спречување корупција, Билјана Ивановска.
Нејзината институција беше една од оние кои премирот Зоран Заев ги повика од вчерашната трибина во Скопје, веднаш да почнат со проверка на имотот на судиите, обвинителите и членовите на нивните семејства, заедно со УЈП, Катастарот, Централниот регистар, МВР и Финансиската полиција.
„Испитувањето на имотната состојба е нова надлежност на Државната комисија, за чие спроведување потребно е зајакнување на постојните човечки и материјално – технички услови, вклучување на други истражни органи и координација на сите надлежни институции, но врз основа на конкретни задолжувања од страна на Владата, велат од ДКСК.
Подготовката на Националната стратегија врз основа на анализата на ризици е во тек.
Законските надлежности на Антикорупциска во делот на следењето на имотната состојба се спроведуваат преку проверка на вистинитоста на податоците внесени во анкетните листови, како и испитување на имотната состојба доколку има основано сомневање дека имотот на лицето е несразмерно зголемен во споредба со неговите редовни примања и примањата на членовите на неговото семејство.
Во делот на следењето на состојбата на судирот на интереси, Државната комисија ги проверува податоците од изјавите за интереси кои се однесуваат на работни места, членство во управни и надзорни одбори, здруженија на граѓани и фондации и други податоци кои се однесуваат на избраните и именуваните лица и членовите на нивните семејства.
Заев во обраќањето до трибината „На прав пат“ вчера ги посочи судството и обвинителството како последна тврдина на бившиот режим, укажувајќи притоа дека се работи за поединци. Ја повика Антикорупциската комисија да отвори постапки за проверка на имотот на судиите и обвинителите, а УЈП, Катастар, Централниот регистар, МВР и Финансиската полиција уште овој месец да почнат проверки на имотот на судии, обвинители и членови на нивните семејства.
Европската комисија ја повика да го активира инструментот за мониторинг на судски случаи од висок профил и со тоа прочистувањето на судството, како што рече, да почне веднаш и со тоа „последниот бастион да падне“ за да не се повтори судството заробено во тефтерче.