Дали Русковска ќе се пријави на конкурсот и ќе бара нов мандат, бидејќи актуелниот и истекува во ноември, таа утрово за „360 степени“ изјави дека сè уште не планира да се пријави. Таа во вторникот го добила решението за поведување дисциплинска постапка откако таков предлог достави републичкиот обвинител Љубомир Јовески
Дисциплинска постапка или кривична пријава против некој обвинител не е пречка за тој да се пријави на огласот за шеф на Основното јавно обвинителство за гонење организиран криминал и корупција (ОЈО ГОКК).
Тоа значи дека и обвинителките Вилма Русковска, која досега беше шефица, како и нејзините колешки Ивана Трајчева и Елизабета Јосифоска, против кои се води дисциплинска постапка, а беше најавена и кривична пријава од Арафат Муареми за претресот во Управата за финансиска полиција, ќе може да конкурираат на огласот што официјално ќе се објави во „Службен весник“ наредната недела.
„Водењето дисциплинска или кривична постапка, не значи дека тие не може да поднесат. Тоа не е завршено, против секој обвинител може да биде поднесена пријава и самото тоа не значи дека е елиминиран од постапката. Секој има право кој ги исполнува овие услови да се пријави на огласот. Понатаму се изготвува кандидатска листа и од неа се изработуваат оние гласачи ливчиња и гласање од страна на сите јавни обвинители“,
изјави денеска претседателот на Советот на јавни обвинители Антонио Јолевски.
Она што е важно како што рече и тој, е кандидатите да ги исполнуваат условите за шеф на ОЈО ГОКК, а тоа се шест години да имаат непрекинат работен стаж како јавни обвинители и за последните три години да се оценети со позитивни оценки. Тука се и основните услови, како што се: кандидатот да е државјанин на Република Северна Македонија; активно да го владее македонскиот јазик; да има деловна способност; да има завршени правни студии со стекнати 300 ЕКТС или VII/1 степен на образование од областа на правните науки или нострифицирана диплома од правни студии во странство за стекнати 300 кредити; да има положено правосуден испит во Република Северна Македонија.
Огласот вчера беше објавен на веб-страницата на Советот на јавни обвинители, официјално во весник ќе се објави наредниот вторник или среда, по што ќе почне да тече рокот од 15 дена за пријавување. За првпат, шеф на ОЈО ГОКК ќе се бира на непосредни избори од страна на сите обвинители во државата, кои ги има 163. Тие, според најавите, ќе гласаат на 31 октомври.
Во моментов сме 164 обвинители, но до крајот на месецот еден ќе исполни услови за старосна пензија, што значи дека ќе има 163 обвинители. Избирачкиот список ќе го објавиме во рок од пет дена откако ќе се објави огласот“, рече Јолевски.
По завршувањето на рокот за пријавување, а пред гласањето, Комисија за спроведување на гласањето ќе ги утврди кандидатите и ќе состави гласачко ливче.
Дали на овој конкурс ќе се пријави Русковска и ќе бара нов мандат бидејќи актуелниот и истекува во ноември, таа утрово за „360 степени“ изјави дека сè уште не планира да се пријави. Таа во вторникот го добила решението за поведување дисциплинска постапка откако таков предлог достави републичкиот обвинител Љубомир Јовески.
„Да, го добив решението во вторникот и треба во рок од пет дена да се изјаснам по него“,
ни изјави Русковска.
Таа засега не размислува и за пријавување на евентуален конкурс за републички обвинител на местото на Јовески доколку тој биде избран за уставен судија, но она на што аплицирала е конкурсот за обвинител во републичкото обвинителство. Со тој оглас се бараат двајца обвинители, а неофицијално се пријавиле шест кандидати. Меѓутоа, таму освен пријавувањето на кандидатите, процесот на избор и по неколку месеци не преминал во следна фаза.
„Тоа е последен оглас, претходно имаше и за Вишото обвинителство, меѓутоа по тие огласи ги немаме добиено сите оценки иако се побарани од јуни месец. Веројатно заради одморите не можеа да се извршат оценување на пријавените кандидати и чекаме кога ќе стигнат оцените за да можеме да пристапиме кон следната фаза, тоа е интервјуа и избор“,
рече денеска Јолевски.