Како одговорен дистрибутер ги преземаме сите неопходни чекори за одржување целосна доверба од купувачите и дејствуваме за брзо повлекување на наведените производи од пазарот, велат од фирмата што ги дистрибуира производите
Дистрибутерот на асортиманот на компанијата „Фереро“ во земјава, „Атлантик трејд“ соопшти дека на барање на производителот „Фереро“, го проширува повлекувањето од пазарот на целокупното производство на „киндер шокобонс“, „киндер сурприсе макси100 г“ и „киндер мини микс пелуче“.
Од пазарот се повлекуваат само оние производи што се произведени во Арлон во Белгија.
Како што е соопштено, во контекст на тековното испитување за салмонела во соработка со органите за безбедност на храната, „Фереро“ привремено ја затвора својата фабрика во Арлон во Белгија. Веднаш се прекинува целото производство на „киндер шокобонс“, „киндер сурприсе макси 100 г“ и „киндер мини микс пелуче“, од Арлон.
„Како одговорен дистрибутер ги преземаме сите неопходни чекори за одржување целосна доверба од купувачите и дејствуваме за брзо повлекување на наведените производи од пазарот. Ги замолуваме потрошувачите доколку веќе поседуваат некој од горенаведените производи да не го консумираат. Може да го вратат во продажното место од каде што го купиле, како и да го контактираат тимот за грижа на потрошувачи на potrosacki-servis@ferrero.com“,
наведе компанијата дистрибутер.