Во тужбата, како што кажа претседателката на ДКСК, Билјана Ивановска, Комисијата се товари дека јавно објавувала информации за Мојсовски
Претседателката на Државната комисија за спречување на корупција (ДКСК), Билјана Ивановска, на денешната седница на Комисијата изјави дека директорот на Агенцијата за млади и спорт (АМС), Наумче Мојсовски, поднел тужба за клевета против ДКСК.
Во тужбата, како што кажа Ивановска, Комисијата се товари дека јавно објавувала информации за Мојсовски.
„Станува збор за предмет кој во континуитет се работи две години. Го изанализиравме функционирањето на АМС во целина, дадовме препораки кои директорот не ги реализира“,
рече Ивановска.
Во февруари годинава ДКСК најави дека во Јавното обвинителство ќе достави иницијатива за кривично гонење на директорот на АМС, Наумче Мојсовски, и членовите на Централната комисија на АМС поради сомнежи за злоупотреба и непочитување на ваучер-системот на финансирање фондации и спортски клубови.
Членот на ДКСК, Владимир Георгиев, на денешната седница на Комисијата посочи дека фактите во извештајот на ДКСК за директорот на АМС што се изнесени на една од претходните седници на Комисијата се засноваат на факти за работењето на директорот доставени од Агенцијата или од други надлежни институции.
Членот на ДКСК, Нури Бајрами, пак, посочи дека не му е јасно како едно службено лице не препознало дека седниците на ДКСК се јавни и дека Комисијата е можеби потранспарентна од тоа што е предвидено со закон.
Откако ДКСК во февруари годинава поднесе иницијатива за кривично гонење на директорот на Мојсовски и членовите на Централната комисија на АМС поради сомнежи за злоупотреба и непочитување на ваучер-системот на финансирање фондации и спортски клубови, од Агенцијата преку писмено соопштение ги отфрлија ваквите наоди како тенденциозни и целосно неточни.