Поранешниот пратеник и функционер на ВМРО-ДПМНЕ ја повика опозицијата да покаже иницијатива за надминување на состојбите во образованието во земјава
Поранешниот пратеник и функционер на ВМРО-ДПМНЕ, Илија Димовски, презентира „календар“ за тоа кога почнала учебната година во другите земји во регионот, со исклучок на нашата земја, каде што летниот распуст е пролонгиран до 1 октомври поради ситуацијата со ковид-19.
„Македонија е последна држава која ќе ги започне својот образовен циклус и училишна година… Погледнете ги датумите кога веќе почна училишната година во земјите од регионот“,
напиша Димовски на Фејсбук.
– Хрватска 7.9.2020 година;
– Србија 1.9.2020 година;
– Бугарија 15.9.2020 година;-
– Косово 14.9.2020 година;
– Албанија 14.9.2020 година;
– Грција 7.9.2020 година (порано од вообичаено за да се надополни изгубеното);
– Босна и Херцеговина 1.9./7.9.2020 година;
Словенија 1.9.2020 година;
– Турција 31.8.2020 година (три недели порано од вообичаено);
– Романија 14.9.2020 година.
Димовски набројува и што треба да се преземе за да се надмине ситуацијата со образованието:
1. Одговорност на сите од МОН и од образовните институции затоа што не презеле мерки за навремено почнување на училишната година;
2. Да му се предложи на премиерот Зоран Заев, кога веќе министерот нема никакво познавање и искуство од образовниот систем, барем заменик-министерот што ќе го предложи да има стручно искуство и познавање од областа на образованието;
3. Итна собраниска седница со една точка на дневен ред: состојбите во образованието, причините зошто не започна училишната година и предлог-мерки за средување на хаосот во образованието;
4. Формирање национално координативно тело (борд) за образование, составено од сите универзитети, синдикати и организации од областа на образованието, со поддршка на сите парламентарни партии, за преземање на сите неопходни мерки за средување на хаосот во образованието;
5. Одговорност за катастрофално ниското ниво на искористеност на средствата за капитални инвестиции од буџетот оваа година (околу 35%), но и сите минати години
6. Набавка на компјутер за секое дете (барем за оние од сиромашни и социјално загрозени семејства) и брза припрема на платформи за онлајн-настава;
7. Посебна програма за одвивање нормална настава на високообразовните институции;
8. Посебна програма за целосно интегрирање на учениците и студентите кои имаат статус на лица со посебни потреби.
„Власта е неспособна, опозицијата мора да покаже иницијатива, се работи за иднината на децата и државата“,
напиша Димовски на Фејсбук во пресрет на денешната собраниска седница за измена на законите за основно и за средно образование.