Министерот за надворешни работи, Никола Димитров денеска, не сакаше да прогнозира околу датумот за добивање на преговори со Европската Унија (ЕУ) во пресрет на закажаниот состанок на Советот за општи работи, но порача дека би било убаво во овие тешки времиња да има и добри вести.
„Сега за сега се планира да се одржи Советот за општи работи на 24 март, меѓутоа не е исклучено и овој Совет да се одржи со видео-конференција, правниците сега коментираат дали на таков начин можат да се носат одлуки, или тоа ќе биде повторно со писмени коментари, изразување на писмена согласност итн. Со оглед на искуството од минатите две години, а со оглед на овие исклучителни околности, се обидувам да не прогнозирам“,
рече Димитров.
Тој на прес-конференција, по ратификацијата во шпанскиот Сенат на Пристапниот протокол за НАТО, рече дека вчера разговарал телефонски со холандскиот министер за надворешни работи Стев Блок, во однос на евроинтеграциите. Холандскиот министер рекол дека холандската влада во целост се согласува со Европската комисија кога вели дека Северна Македонија испорачала опипливи и одржливи резултати и дека заслужуваме да почнеме пристапни преговори односно да влезе во следната фаза од евроинтеграциите. Затоа, Димитров вели, нема суштински пречки за недобивање датум, но има задршки околу одржувањето на состанокот.
„Не гледам суштински пречки, имам задршки околу процесот како ќе изгледа тој состанок, дали ќе најдат начин да седнат. Меѓутоа светот мора да функционира, меѓународните организации мора да функционираат, државите мора да функционираат и мислам дека е убаво во овие тешки времиња да има и добри вести. Ова ќе биде историска добра вест за нас, но сигурно ќе биде добра вест и за ЕУ“,
рече Димитров.