Вицепремиерот и шефот на дипломатијата ќе се сретнат со повеќе министри за надворешни работи, меѓу кои и со португалскиот чија земја во моментов е претседавач со Советот на ЕУ
Вицепремиерот за европски прашања, Никола Димитров, и министерот за надворешни работи, Бујар Османи, заминуваат во Брисел каде ќе имаат повеќе средби со претставници на ЕУ.
Таму ќе се сретнат и со министерот за надворешни работи на Португалија, Агусто Сантош Силва, чија земја е претседавач со ЕУ.
Од Владата велат дека Димитров и Османи ќе имаат средби и со претставници од институциите на ЕУ. На маргините на Советот за надворешни работи на Унијата, кој ќе се одржи утре, планирани се и билатерални средби со повеќе шефови на дипломатиите на земјите-членки на ЕУ.
Португалија го презема претседателството со Советот на ЕУ на 1 јануари и ќе го предводи во првите шест месеци од годината. Како приоритети ги најави економското закрепнување, климатската и дигиталната транзиција и јакнењето на стратешката автономија на ЕУ.
Неколку дена по преземањето, португалскиот амбасадор во ЕУ, Нуно Брито, рече дека официјален Лисабон ќе се однесува претпазливо кон прашањето за проширувањето. Тој потенцираше дека португалското претседателство нема да брза и да предлага нови заклучоци на Советот на ЕУ за проширувањето.
Прашан како го оценува однесувањето на Бугарија, која со своето вето го блокира почетокот на пристапните преговори со Северна Македонија, амбасадорот Брито, како што пренесе бугарската БТА, одговорил дека „не е во ред да се обвинува Бугарија за попречување на процесот, бидејќи токму таа држава е еден од силните поддржувачи на проширувањето на ЕУ“.
Вицепремиерот Никола Димитров, пак, на почетокот на јануари во интервју за МИА, рече дека очекува Португалија да биде заинтересирана за проширувањето и ќе ги продолжи напорите на Германија, бидејќи Унијата не може да си дозволи луксуз и оваа 2021 да помине со неуспех како 2020 година.
Вчера за проширувањето во интервју за Гласот на Америка зборуваше и американската амбасадорка во Северна Македонија, Кејт Мари Брнз, која рече дека е потребно Северна Македонија да ги почне преговорите што е можно побргу.
„Веруваме дека Северна Македонија има покажано оти е подготвена за нејзината прва меѓувладина конференција, која се надеваме дека сè уште ќе може да се случи што е можно побрзо. Ние сме охрабрени што Португалија истакна дека проширувањето на ЕУ во целина ќе биде приоритет и за време на нејзиното претседателство“,
рече амбасадорката која оцени и дека бугарското вето носи ризици за регионот.