Со линеарен раст на нови случаи на ковид-19, успеваме да го амортизираме здравствениот систем и да ги оптимизираме болничките капацитети, истакнал министерот за здравство
Министрите за здравство и за надворешни работи, Венко Филипче и Никола Димитров, денес учествуваа на видеоконференција со амбасадорите на земјите членки на ЕУ во Северна Македонија, со која претседаваше амбасадорот на Делегацијата на ЕУ во Скопје, Самуел Жбогар.
На видеоконференцијата, како што се соопштува, се разменети информации и мислења за состојбата со ковид-19 во земјава, како и за можностите за поефикасно сузбивање на кризата преку помошта од ЕУ, но и билатералната соработка со нејзините земји членки.
„Засега успешно го менаџираме текот на епидемијата. Со линеарен раст на потврдени позитивни пациенти на ковид-19, успеваме да го амортизираме здравствениот систем и да ги оптимизираме болничките капацитети и медицинскиот персонал. Пикот на епидемијата го очекуваме кон крајот на април и почетокот на мај. Мерките и препораките даваат резултат. Во услови кога целиот свет се соочува со кризата, поддршката што ја добиваме од ЕУ и земјите членки е од исклучителна важност и доказ дека заедничкото дејствување и заемното помагање водат кон побрзо справување со оваа состојба“,
истакна Филипче.
Министерот Димитров ја поздрави одлуката на Европската комисија да ја прифати иницијативата на министрите за надворешни работи од земјите од регионот за укинување на извозните рестрикции за Западниот Балкан за набавка на медицинска заштитна опрема од ЕУ. Се заблагодари за континуираната поддршка што земјата ја добива на повеќе нивоа, како од Унијата така и од нејзините земји членки.
„Солидарноста на ЕУ, како дел од нејзиниот координиран глобален одговор на кризата, е од витално значење за нас и нашиот регион. Нашиот главен фокус е да ги заштитиме македонските граѓани, како во однос на нивното здравје, така и во поглед на социо-економските последици од пандемијата. Поддршката од ‘Тимот Европа’ има клучна улога при реализирањето на нашите цели. Благодарни сме што сме дел од тој тим, заеднички работејќи и при успешниот процес на репатријација на македонските, но и на граѓаните од ЕУ“,
истакна Димитров.
Амбасадорите на земјите членки на ЕУ во Северна Македонија, како што се соопштува, ја истакнале посветеноста на македонските власти при справувањето со коронавирусот, поздравувајќи ја навремената координација и имплементација на мерките. Тие се заблагодариле за транспарентноста и кооперативноста на Владата при информирањето, репатријацијата, безбедноста на сите граѓани во земјата, вклучувајќи ги и странските државјани.