“Ако сака да биде позитивна сила, да поттикнува политика на компромис, да стимулира прореформски влади, ЕУ мора да го признае напредокот на Северна Македонија“ – порача министерот Никола Димитров на тркалезната маса „Координирање, соработка, консолидирање? Придвижување на З. Балкан напред“, во рамките на 56-та Минхенска безбедносна конференција.
“Има една формула за успех: потребна ни е добра методологија, чесен пристап кон имплементирање на истата и политичка волја од двете страни. Влогот е огромен.“
– порача Димитров.
На маргините на конференцијата министерот Димитров и денеска оствари повеќе билатерални средби и тоа со луксембуршкиот дипломат Жан Аселборн, извршниот директор на Американско-еврејскиот комитет Дејвид Харис и генерален директор за политички прашања во британскиот Форин Офис, Ричард Мур.
Главниот акцент на разговорите, како што соопшти МНР, беше ставен повторно на најактуелното прашање за ЕУ-перспективата на нашата земја, во пресрет на клучните моменти за добивање позитивна одлука за отпочнување пристапни преговори.
Министерот Димитров учествуваше и на работната вечера организирана од претседателот на Светскиот економски форум Борге Бренде и извршниот директор на Google Jigsaw Џеред Коен, на која почесен гостин беше американскиот државен секретар Мајк Помпео.