„Страшно е кога немате план и визија, тогаш ниту една банка не ве поддржува. Но, ако имате добри бизнис-планови како ја гледате иднината на компанијата, тогаш банките можат да го сменат размислувањето и да ве поддржат. Суштината е во тоа како ве гледаат и како ве оценуваат банките. Доколку имаат доверба во вас, не значи ништо тоа што компанијата е толку задолжена“, вели министерката за финансии
Пари од државниот буџет нема да одат кон АД ЕСМ. Ова денеска на прес-конференција по повод 100 дена од сработеното го изјави министерката за финансии Гордана Димитриеска-Кочоска, која посочи дека компанијата буквално е уништена од претходната влада, но оти средства ќе треба да обезбеди од синдицирани заеми од комерцијалните банки.
„Останувам на ставот дека пари од буџетот нема да одат кон ЕСМ. Понатаму ќе видиме дали комерцијалните банки ќе им одобрат или нема да им одобрат кредити. Мислам дека тоа веќе е и договорено и дека тоа помина како информација на последната седница на Влада. Изминатите денови бев во Будимпешта и не ја следев комплетно ситуацијата, но според моите информации, тоа требаше да биде поминато на Влада, односно дека ЕСМ ќе си ги обезбедат средствата од синдицирани заеми од комерцијалните банки во земјава“,
рече таа.
На прашањето дали АД ЕСМ има можност да добие кредит од банките во земјава, министерката рече дека дека не се сомнева оти имаат можности.
„Страшно е кога немате план и визија, тогаш ниту една банка не ве поддржува. Но, ако имате добри бизнис-планови како ја гледате иднината на компанијата, тогаш банките можат да го сменат размислувањето и да ве поддржат. Суштината е во тоа како ве гледаат и како ве оценуваат банките. Доколку имаат доверба во вас, не значи ништо тоа што компанијата е толку задолжена“,
вели министерката.
Според неа, компанијата е уништена од претходната влада, но благодарение на новиот менаџмент и новиот директор сега се реорганизира, а банките го препознаваат тоа.
Минатата недела премиерот Христијан Мицкоски рече дека за многу скоро време од страна на истражните органи ќе бидат посочени лицата што се виновни за состојбата во која е оставена компанијата АД ЕСМ.
Коментирајќи го долгот на АД ЕСМ, рече дека по фактури за увоз на јаглен, тој е околу милијарда и пол денари или 25 милиони евра на правни лица, но по направени преговори со нив добиен е попуст од околу 5 милиони евра.
Според информациите што ги добива од ЕСМ, премиерот рече дека се прави реорганизација во самата компанија и таа веќе почнува да функционира.