Барем засега останува да работи преносот на Јутјуб каналот на Државната изборна комисија каде може да се следат резултатите
Државната изборна комисија ја одржа својата последна прес-конференција за вечерва без притоа да бидат пребројани резултатите од сите избирачки места. Честа да ги пренесе последните информации на јавноста, која е во исчекување ДИК да каже кој победил според неофицијалните и првични резултати, му беше дадена на портпаролот на институцијата Адмир Шабани.
На последната прес-конференција на која се обрати претседателот на телото, Оливер Дерковски не сакаше да „шпекулира“ за резултатите.
Како и да е, Шабани ги прочита на јавноста оние податоци кои ги имаше на располагање за вечерва. Води СДСМ пред ВМРО-ДПМНЕ, води ДУИ пред Алијанса и Алтернатива со пребројани 93,96% од избирачките места.
- Коалицијата „Можеме“ – 36,13%
- Коалицијата ВМРО-ДПМНЕ и други – 34,65%
- ДУИ – 11,57%.
- Алијансата за Албанците и Алтернатива – 8,79%
- Левица – 3,96%
- ДПА – 1,48%
- Интегра – 1,33%…
„Вечерва нема да ги соопштиме мандатите согласно овие податоци туку распределбата на мандатите на политичките партии ќе биде соопштена во текот на утрешниот ден кога и ќе се направат официјалните проверки од записниците број 16 за гласањето за секое избиричако место и од записниците број 21 на ниво на општина“,
изјави Шабани.
На новинарските прашања Шабани објасни дека се уште немаат одговор кој точно го „бутна“ сајтот на Државната изборна комисија на која јавноста требаше да ги следи резултатите.
„Останува во текот на утрешниот ден и во текот на наредните денови да провериме што точно се случи, за каков напад се работи. Ќе напоменам уште еднаш, во моментов тоа што можам да го кажам е дека се работи за надворешен напад на платформата во која се прикажуваат резултатите за јавноста, не е и на програмата за внес на податоци“,
изјави Шабани.