На свечена седница, по соопштувањето на конечните официјални резултати од парламентарните избори, Државната изборна комисија (ДИК) ги врачи уверенијата за мандатите на новите пратеници.
Меѓутоа, на седницата не се појавија двата пратеника од Левица или некој претставник на партијата, како и претставник на ДПА или лидерот Мендух Тачи кој е единствениот од оваа партија кој влезе во новиот парламент. Уверенијата не беа подигнати ниту за 12-те пратеници од коалицијата Алијанса за Албанците – Алтернатива.
Од СДСМ и Коалицијата „Можеме“, во ДИК испратија само еден претставник да ги подигне мандатите за сите 46 пратеници.
„Поради пандемијата одлучивме на ваков начин да ги подигнеме уверенијата на коалицијата „Можеме“. Благодарам на сите што учествуваа во овој изборен процес, на ДИК и на сите органи и секако и вас медиумите. Ви благодарам на сите и благодарност уште еднаш до ДИК и на сите учесници во изборниот процес“,
рече претстаникот Бранко Георгиевски.
Од ВМРО-ДПМНЕ и коалицијата „Обнова за Македонија“ дојдоа десетина пратеници, додека за останатите уверенијата ги подигна генералниот секретар на партијата, Игор Јанушев, кој, исто така, е дел од новиот парламентарен состав.
„Очекуваме дека во следниот период, а секако во законски предвидените рокови дека ќе нè повикаат и на конститутивната седница на Собранието. Би сакал уште еднаш да се заблагодарам на буквално сите во Република Македонија коишто го дадоа својот глас за коалицијата предводена од ВМРО-ДПМНЕ за ‘Обнова на Македонија’. Она што имавме прилика да го видиме на изборите е дека и покрај сите неправилности, поткупи и се она што се случуваше особено во текот на пред кампањата и во кампањата дека сепак опозициските партии успеаја да освојат повеќе гласови од владејачката структура“,
порача Јанушев.
Тој не сакаше многу да коментира за можностите за формирање влада, туку само кратко посочи дека една од варијантите е ВМРО-ДПМНЕ да ја предводи владата, како и дека има неформални контакти, но оти очекува сите да бидеме благовремено информирани кога сето тоа ќе заврши.
Прашан што мисли за шпекулациите дека СДСМ се обидува да поткупи пратеници, Јанушев одговори дека она што се обидува да се направи во моментов е само „одработување исклучително за Заев и за никој друг“.
„Овие информации како што ги нарекувате првично доаѓаат од едно место така што не сметам дека се достојни за каков било коментар или внимание од моја страна. Значи, она што се обидува да се направи во моментот е само одработување исклучително за Заев и никој друг“,
рече Јанушев.
Исто како и СДСМ, и во името на ДУИ имаше само еден претставник кој ги подигна уверенијата.
„Јас како овластен претставник на ДУИ денеска ги подигам уверенијата за сите наши пратеници од изборите одржани на 15 јули. На сите им посакувам успешна работа. Изборниот процес беше во ред, ние немавме никакви забелешки, така што на сите пратеници им честитам“,
изјави Фитим Лога од ДУИ.