„Утре во текот на денот ако се појавуваат проблеми ќе ги решаваме во од бидејќи таква е проблематиката која мора да се решава тековно“, вели претседателот на ДИК
Државната изборна комисија (ДИК) е целосно подготвена за спроведување на утрешните претседателски избори, изјави денеска на седница претседателот на ДИК, Александар Даштевски.
Според Даштевски, подготовките никогаш не престануваат, а контактите траат постојано и вели дека проблемите, доколку се појават, ќе се решаваат тековно.
„Целосно сме подготвени за утрешниот ден. И тие подготовки никогаш не престануваат. Постојано на некого нешто му фали така што сме во контакт нонстоп со луѓето. Од сабајле сме имале повеќе контакти и ќе продолжиме да бидеме во контакт. И утре во текот на денот ако се појавуваат проблеми ќе ги решаваме во од бидејќи тоа е таква жива проблематика која мора да се решава тековно“,
рече Даштевски.
Тој повтори дека правото на глас на утрешните избори граѓаните ќе можат да го остварат со важечки документ за лична идентификација, лична карта и патна исправа со старо уставно име на Република Македонија како и со лична карта и патна исправа чија важност истекла девет месеци пред денот на одржувањето на изборите, а за утре тоа е 24 јули 2023 година.
Според него, на денешното гласање каде што своето право го остваруваа болните, затворениците, лицата во старските домови, како и македонските граѓани во дијаспората, немало проблеми.
„Гласањето добро се одвива и трае и тие податоци ќе ги имаме до вечер. Некаде е завршено, но гласањето трае до 19 часот’“,
рече тој.
Од ДИК информираат и дека по завршување на денешното гласање, гласачките ливчиња ќе бидат запечатени во пликови, а оти резултатите ќе бидат сублимирани и објавени утре заедно со останатите гласови. Денеска ДИК, како што беше појаснето, ќе објави информации само за излезеноста на гласачите.
На денешната 98. седница беа акредитирани нови набљудувачи за претседател и за парламентарните избори. Вкупната бројка на набљудувачи се зголеми на 1 601, од кои 915 се домашни, а 544 меѓународни набљудувачли, 84 преведувачи како и 58 странски новинари.
Дополнително на седницата беа одобрени акредитации на ОБСЕ/ОДИХР за четворица набљудувачи и двајца преведувачи, за Косова прес за двајца новинари, на Амбасадата на САД за четворица набљудувачи, Еуроњуз Албанија за двајца новинари, за Фондација ромите за демократија за двајца набљудувачи, за „АБЦ Њуз“ Албанија тројца новинари, „Асошиејтед прес“ пет новинари, ТВ АРД Германија еден новинар, Прва ТВ Србија двајца новинари, РТВ Косово пет новинари, ТВ ЗДФ 3, Вејк уп дополнување со 570 набљудувачи, Македонски центар за културен развој еден набљудувач, ТВ Н1 за двајца новинари, БНТ тројца новинари, и ИФЕС дополнување со еден набљудувач за парламентарните избори.
Акредитираните набљудувачи и странски новинари и медиуми добиваат беџови од ДИК за да можат да ги следат изборите, додека како што појасни членот на ДИК, Борис Кондарко, домашните новинари, фоторепортери и сниматели ќе можат да известуваат и да ги посетуваат избирачките места од изборите само со своите прес-легитимации.
„Дозволено е да се снима и да се слика во избирачките места, но не е дозволено да се снима и да се слика зад параванот за да не се наруши тајноста на гласањето, како и Избирачкиот список бидејќи таму има лични податоци на граѓаните. Евентуално може да се направи исклучок ако некој од гласачите затекнати на избирачкото место не сака да даде согласност и не сака да биде снимен“,
рече Кондарко.