Државната изборна комисија го повика политичкиот државниот врв да ја преиспита одлуката за одржување на предвремени парламентарни избори на 12 април.
Пред утрешниот состанок на Советот за безбедност свикан од претседателот Стево Пендаровски поради ширењето на коронавирусот, членовите на ДИК на денешната седница укажаа дека не станува збор само за денот на иборите, туку проблематична е и организацијата во која се вклучени голем број луѓе кои треба да се во постојан контакт.
Само членови на избирачките одбори се 35 000 луѓе, а во организација на изборите е вклучен и огромен број административно технички и логистички персонал. Треба да бидат заменети и 3 200 лица од медицинскиот персонал кои што се членови на избирачките одбори и општинските изборни комисии.
Претседателот на ДИК, Оливер Деркоски потенцираше дека треба да се донесе одлука со ладна глава и дека најважно е здравјето на граѓаните.
Според него, редуциран е бројот на активностите на ДИК и се прават сите напори голем дел од обврските да се завршуваат по електронски пат, но посочува дека во нивните простории понекогаш поради обврските поврзани со организација на изборите се собирале по 200 до 300 луѓе дневно. Сепак, вели ќе продолжат со работа се додека не се донесе нова одлука од надлежните институции.
Деркоски посочи дека ДИК нема претставник во Советот за безбедност и затоа ја користат седницата за јавно да ги кажат своите ставови, а целта е да помогнат при донесувањето на соодветна одлука.
Одложувањето на изборите е се поизвесно, откако деновиве порасна бројот на новозаболени од коронавирусот, а стапија на сила и строгите владини мерки за спречување на локална трансмисија на вирусот.
Политичките партии најавија дека до 22 март ги прекинуваат сите активности во пресрет на изборите. За ова техничкиот премиер Оливер Спасовски добил уверување од сите партии, по телефонски разговори со партиските лидери Зоран Заев, Христијан Мицкоски, Али Ахмети, Зијадин Села, Билал Касами и Африм Гаши.
На лидерската средба која се одржа минатата недела партиските лидери се договорија дека ќе се следи развојот на состојбата со коронавирусот и дека здравјето на граѓаните ќе биде приоритет.
И претседателот Стево Пендаровски на пресконференцијата на која ја најави утрешната седница на Советот на безбедност порача дека треба сериозно да се размисли дали да се организираат избори, посочувајќи дека и да се одложат нема да е крај на светот.
Поврзани вести:
Одложувањето на изборите сѐ поизвесно?
Пендаровски: Сериозно би размислувал за опцијата за одложување на изборите
Мицкоски: Ќе следиме дали има логика да се одржат изборите, сега тоа не е приоритет
Димитров: Иако ни одговара да има избори, со јавното здравје нема калкулирање