Европратениците Ќучук и Валсман се интересирале за процедурата за усвојување на уставните измени, согласно Договорот со Бугарија, за односите меѓу политичките партии во Собранието и очекувањата на учесниците во Работната група во однос на временската рамка за финализирање на нацрт-текстот на новиот Деловник
Тековните состојби во Парламентот, работата на комисиите, текот на дебатата на пленарните седници, како и активностите што се планирани во насока на усвојување на предлог-закони за до крајот на годинава биле темите со кои претседателот на Собранието Талат Џафери денеска во Брисел ги запознал европратениците Илхан Ќучук и Марион Валсман.
Европратениците, пак, како што информираат од кабинетот на Џафери, се интересирале за процедурата за усвојување на уставните измени, согласно Договорот со Бугарија, за односите меѓу политичките партии во Собранието и очекувањата на учесниците во Работната група во однос на временската рамка за финализирање на нацрт-текстот на новиот Деловник, а искажале и безрезервна поддршка за забрзување на преговарачкиот процес со ЕУ.
Како што соопштуваат од кабинетот на Џафери, тој се осврнал и на средбите на Работната група за учество на Дијалогот Жан Моне која остварува средби самостојно, без присуство на европратениците и ги известил за постигнатиот напредок во рамките на тие средби кои се фокусирани на усогласување на консензуален Деловник за работа на Собранието.
„Во овој контекст, европратениците се согласија со претседателот дека клучна алатка за демократските процеси е постоењето добро структуриран Деловник, кој ќе овозможи да се слушне мислењето на сите учесници во процесот на донесување одлуки, без разлика на владејачкото мнозинство и кој нема да биде алатка за ограничување или блокирање нa законодавната постапка, особено не на усвојувањето на законите кои се во интерес на граѓаните, затоа што граѓаните се уморни од трошење време и чекање за да се реализира конечната цел – европски стандарди во Република Северна Македонија“,
се наведува во соопштението.
Во однос на регионалната соработка, претседателот на Собранието го потенцирал вниманието кое се посветува на Берлинскиот процес и Резолуциите на Европскиот парламент, а во светло на последната Резолуција на ЕП се осврнал на иницијативата Отворен Балкан, која се гледа како полезна платформа за економска соработка и намалување на разликите меѓу соседите, а не како замена за Берлинскиот процес.
Во однос на глобалните геополитички состојби, претседателот Џафери го подвлекол приклучувањето на Северна Македонија кон сите одлуки и санкции на ЕУ против Руската Федерација и дека согласно своите државни капацитети ги поддржува сите одлуки и активности на НАТО кои произлегуваат од нашето полноправно членство.