На маргините на Европската конференција на претседатели на парламенти, Џафери и Линдита Никола се осврнаа и го поздравија и позитивниот извештај на Европската комисија за напредокот на двете држави за 2021 година
Претседателот на македонското Собрание, Талат Џафери, оствари денеска протоколарна средба со новоизбраната претседателка на Собранието на Албанија, Линдита Никола, за време на Европската конференција на претседатели на парламенти, која се одржува во Атина.
Честитајќи ѝ за изборот на функцијата, Џафери, како што соопштија од неговиот кабинет, изразил надеж дека одличната парламентарна соработка ќе продолжи да се развива и унапредува и во наредниот период. Соговорниците размениле информации за актуелните случувања во двете земји, при што Џафери информирал за локалните избори во земјава, за кои рекол дека се спроведуваат според највисоките меѓународни стандарди и изрази уверување дека во иста, фер, мирна и демократска атмосфера, ќе помине и претстојниот втор круг на 31 октомври.
Џафери и Никола се осврнаа и го поздравија и позитивниот извештај на Европската комисија за напредокот на двете држави за 2021 година.
Дводневната Европска конференција, на која присуствуваат 48 претседатели на парламенти, беше отворена денеска, со обраќање на претседателот на грчкиот парламент, Константин Тасулас, претседателот на Парламентарното собрание на Советот на Европа, Рик Даемс и генералниот секретар на Советот на Европа, Марија Пејчиновиќ Буриќ.
Како што се наведува во соопштението од Собранието, во однос на темата за споделување искуства за предизвиците што пандемијата со ковид-19 ги наметна врз демократиите и за решавањето на слични кризи во иднина, беше подвлечена важноста на парламентите како гаранти на демократијата во време на криза и беше поздравен фактот што повеќето парламенти успееја да ги обезбедат неопходните приспособувања на нивните правила и процедури, со цел да продолжат да ги извршуваат уставните улоги за време на пандемијата.
Според агендата, Џафери ќе се обрати на вториот ден на Конференцијата, на тема „Заедничката иднина на сите европски граѓани“, а на маргините на настанот предвидено е тој да се сретне и со претседателот на грчкиот парламент и со потпретседателката на шведскиот парламент, Џонсон Форнаве.