Претседателката Урсула фон дер Лајен, како што се наведува, истакна дека ѝ е драго што може и на дело да ја потврди поддршката што ЕУ ѝ ја дава на Република Северна Македонија и генерално на земјите од регионот
Посетата на претседателката на Европската комисија Урсула фон дер Лајен на земјава е исклучително поволен знак на заедништвото и поддршката од Европската Унија и потврда за оправданоста на нашата стратегиската определба за полноправно членство во Европската Унија, смета претседателот на Собранието Талат Џафери.
Како што соопшти собраниската прес-служба, Џафери присуствуваше на заедничката вечера што ја приреди претседателот Стево Пендаровски во чест на претседателката на Европската комисија Урсула фон дер Лајен и на која присуствуваше државниот врв и шефот на Мисијата на ЕУ во Скопје, Дејвид Гир.
„Џафери изрази задоволство за нејзиното доаѓање токму во овој период кога целиот регион се соочува со влијанијата од актуелната енергетска криза, особено имајќи предвид дека нејзиното доаѓање е во насока на претставување на дополнителната поддршка што Европската Унија ќе ѝ ја даде на Република Северна Македонија и на регионот“,
стои во соопштението.
Ова, како што се наведува, е исклучително поволен знак на заедништвото и поддршката од Европската Унија и потврда за оправданоста на нашата стратегиската определба за полноправно членство во Европската Унија.
„Секако дека потпишувањето на договорот со Фронтекс и на македонски јазик е потврда за тоа што претседателот Џафери го истакна при претходната средба со претседателката Фон дер Лајен во јули оваа година, дека македонскиот јазик ќе биде регистриран без фусноти и дека времето ќе покаже дека била донесена вистинската одлука“,
се вели во соопштението.
Претседателката Урсула фон дер Лајен, како што се наведува, истакна дека ѝ е драго што може и на дело да ја потврди поддршката што ЕУ ѝ ја дава на Република Северна Македонија и генерално на земјите од регионот.