Претседателот на Собранието, Талат Џафери, за 14-ти јануари закажа пленарна седница на која ќе се најде и предлог Законот за контрола на опојни дроги и психотропни супстанци. Производителите на канабис за медицински цели веќе со месеци бараат Собранието да го изгласа овој закон за да може индустријата да продолжи да се развива.
Четриесетина лиценцирани компании преку Здружението „Макканабис“ вчера го повикаа парламентот што поскоро да го изгласа Законот, бидејќи се соочуваат со финансиски потешкотии што можат да доведат и до отпуштање на голем број од 740 вработени лица во оваа дејност.
Нивните апели вродија со плод, но спротивно на нивните барања предлог законот да биде донесен во скратена постапка, тој ќе се носи во редовна процедура. Тоа значи дека текстот треба да биде разгледан два пати пред матичната Комисија за здравство, пред да биде пуштен на конечно гласање на пленарна седница.
Од „Макканабис“ се надеваат дека законот ќе се изгласа пред Собранието да се распушти на 11 февруари. Велат дека времето ги гази, затоа што со секој изгубен ден пропаѓаат и залихите на сув цвет кои ги имаат во нивните магацини, а чија вредност се брои во милиони евра. Им треба новото законско решение со кое ќе се легализира извозот на сув цвет за да можат произведените колични на сув хербален производ да ги пласираат на пазарите во Европа и пошироко.
„Од ден во ден се намалува интензитетот на канабиноиди во залихите, со тоа губиме, па наместо по добра цена, насобраниот сув цвет сега ќе го продаваме по багателна цена“,
вели Костадин Дуковски, претседател на „Макканабис“.
Од Здружението очекуваат до средина на годинава да бидат донесени потребните подзаконски акти и да биде формирана Агенцијата за контрола на одгледувањето и производството на канабис, со што би стартувал и извозот на оваа тревка од земјава.
„Ако се решат овие прашања следниве месеци ќе имаме минимум 4.000 до 5.000 нови вработувања во рок од една година. Реално пазарот во светот има побарувачка од сув цвет, паралелно како што се отвораат државите и како што ја легализираат марихуаната за рекреативни цели. Се случува и компаниите да не можат да постигнат да ја задоволат побарувачката“,
вели Дуковски.
Ќе се регулира само медицинската, но не и рекреативната употреба
Но законската регулатива не ги отвора само странските пазари за произведувачите на канабис, туку го отвора и домашниот пазар. Со новото законско решение екстрактот од канабис ќе им биде подостапен на пациентите кои имаат потреба од него. Наместо лекот да го препишува само онколог и невротерапевт, со новите измени ќе можат да го препишат и други доктори и специјалисти. Од „Макканабис“ додаваат дека со новиот закон третманот на болестите ќе биде посоодветно и подобро воден.
Иако законот е ставен во редовна процедура, кај парламентарните партии има волја да биде изгласан пред распуштање на Собранието. Извори од парламентот велат дека сите партии се согласни законското решение да биде донесено до крајот на јануари. Се очекува расправата по овој закон да помине без многу дискусии, а најважно било тоа што Законот ќе го носи широката коалиција сега откако е формирана техничка Влада во која учествува и опозицијата.
Пратеничката Јагода Шахпанска од СДСМ очекува законот да биде донесен до крајот на месецов.
„Само треба волја од партиите за Законот да помине пред распуштање на парламентот, има простор тоа да се случи до крајот на јануари“,
вели таа.
Но, сепак барањето на голем дел од јавноста марихуаната да се легализира и за рекреативна употреба засега ќе остане само надеж. Новото законско решение ја регулира употребата на канабис само за медицински цели, додека рекреативната употреба и понатаму ќе биде предмет на кривично гонење. Мислењето на Шахпаска и на дел од пратениците е дека Северна Македонија се уште не е институционално развиена за да го овозможи и тоа.
„Мислам дека не треба да бидеме толку авангардни и да ги пресликуваме сите работи од Европа. Едноставно не сме подготвени за оваа работа. Друго е Холандија, друго се поразвиените економии. Сметам дека за рекреативно користење е прерано да размислуваме“,
вели Шахпаска.