Според властите, огромното мнозинство невакцинирани лица се повикуваат на религиозни или здравствени причини
Околу 9 000 луѓе вработени во јавните служби во Њујорк вчера се испратени на неплатен принуден одмор, бидејќи не се вакцинирале против ковид, а неколку илјади пожарникари се на боледување во знак на протест, објави градоначалникот Бил де Блазио.
Досега повеќе од 300 000 луѓе кои работат во јавните служби во Њујорк мораа да се вакцинираат, а деведесет отсто од вработените го почитуваа тоа, така што во градот се функционира нормално, рече Де Блазио, пренесува АП.
„Сакам да им се заблагодарам на сите што се вакцинираа и ја направија вистинската работа што ни овозможува да продолжиме напред“,
рече Ди Блазио.
Меѓутоа, противпожарната служба има проблеми, бидејќи од 350 станици во градот, 18 денеска не работеа поради недостиг на работна сила, изјави началникот на противпожарната служба Даниел Нигро.
До неделата секој четврти пожарникар не бил вакциниран ниту со една доза, што е услов да продолжат со работа, а тоа не го направил ниту секој шести полицаец, како и една шестина од вработените во комуналните служби.
Според властите, огромното мнозинство невакцинирани лица се повикуваат на религиозни или здравствени причини, така што денеска само 34 полицајци и 40 граѓани кои работат во полиција се испратени на неплатено отсуство.
Во сите градски служби, вкупно околу 12 000 луѓе се повикале на верски или здравствени причини поради кои не се вакцинирани и тие остануваат на работа се додека нивните случаи не се разгледаат поединечно.
Заклучно со вчера на боледување се наоѓаат околу 2 300 пожарникари, а дневниот просек е околу 1 000 луѓе кои одат на боледување, рече Нигро и оцени дека очигледно станува збор за протест против задолжителната вакцинација.
Лидерот на синдикатот што ги претставува њујоршките пожарникари предупреди дека воведувањето задолжителна вакцинација може да ја загрози јавната безбедност, бидејќи се очекува противпожарната служба да работи со 20 отсто помал капацитет, а на располагање ќе има и една петтина амбулантни возила помалку.
Де Блазио, сепак, рече дека приоритет во јавната безбедност е да се запре ширењето на ковид и дека нема да се откаже од вакцинацијата.