Високи 82 проценти од граѓаните веруваат во работата на министерот за здравство Венко Филипче и за тоа како тој се справува со кризата предизвикана од коронавирусот, покажуваат резултатите на анкетата спроведена од Институтот за политички истражувања, а објавена во емисијата „Детектор“ на телевизија Сител.
Наспроти граѓаните кои му веруваат, се 11 проценти кои одговориле дека не се задоволни од работата на министерот.
Анкетата е спроведена телефонски врз репрезентативен примерок од 1.116 испитаници во периодот од 18 до 21 март со маргина на грешка од плус-минус 3 проценти.
Над 40 проценти од граѓаните очекуваат да бидат заразени со коронавирусот, 24,1 процент од анкетираните граѓани мислат дека веројатно нема да се заразат или дека можеби ќе се заразат сметаат 21 процент, додека пак 12,1 процент се сигурни дека нема да се заразат.
Поголем процент или 37,9 отсто сметаат дека во следните неколку недели состојбата со коронавирусот ќе се влоши, а 31,6 проценти очекуваат подобрување.
Мислењето на повеќе од 60 проценти е дека лекарите соодветно ги дијагностицираат и лекуваат пациентите, додека 14,3 проценти се убедени во спротивното. Повисок е и процентот на оние кои сметаат дека здравството има доволно ресурси за да се справи со кризата, односно 42,8 проценти го делат ова мислење, а 34,2 проценти го мислат спротивното.
Над 90 проценти од анкетираните даваат поддршка на мерките за забрана на јавни собири, затворање на угостителските објекти, училиштата и аеродромите, како и затворање на границите.
Над 90 проценти е поддршката и за одложување на изборите, а над 87 проценти за казнување на оние кои не ги почитуваат мерките за изолација и за забрана за движење од еден во друг град.
Најмала поддршка меѓу мерките има полицискиот час, но сепак, дури 74,8 проценти од граѓаните даваат поддршка за оваа мерка.
Најголем дел од граѓаните или 38,8 проценти најмногу се плашат од економската криза кој ја предизвикува вирусот, а 15,3 отсто се најзагрижени за евентуален колапс на здравствениот систем, 10,7 проценти поради можен недостаток на храна, лекови и други стоки, додека 5,6 проценти да не го изгубат своето работно место.
Околу 43 проценти од анкетираните очекуваат земјава да добие помош од Европската Унија за справување со кризата со коронавирусот, а слични се бројките и кога станува збор за очекувањата за помош од НАТО Алијансата.