Анализите кои ќе покажат точно кога настапила смртта на жената од Велес, кај која посмртно беше утврден коронавирус, ќе бидат готови до крајот на оваа недела.
Како што информираше министерот за здравство Венко Филипче, освен Институтот за судска медицина, свој придонес во расчистување на овој случај треба да дадат и други институции, како Министерството за внатрешни работи, обвинителството и останати организации кои ќе ги анализираат дадените наоди.
*Поврзана вест: Во Дебар и Центар Жупа ќе се прави скрининг кој ќе опфати 20-30 проценти од населението
Анализите практично ќе го дадат и одговорот што ја вознемири јавноста, а тоа е дали коронавирусот бил присутен во земјава многу порано пред официјално дијагностицираниот прв случај на 26 февруари.
„Иницијално, идејата за таква форма на анализа потекна од позитивниот брис на починатата во Велес. Потоа може да се знае точното време на смртта. Многу фактори влијаат на степенот на распаднатоста на телото, температурата и слично. Тоа не е нешто што може само Институтот за судска медицина да го утврди и непосредно потоа ќе го знаеме времето на смрт. А тоа можеби ќе ни укаже на некој информација која ќе оди и во насока на одговор од кога точно е присутен коронавирусот во земјава“,
рече Филипче.
Тој појасни дека тест за коронавирус ѝ бил направен на починатата жена затоа што не била јасна причината за смрт.
„Според мене, добро е што е направен тој тест бидејќи може да добиеме повеќе информации во врска со вирусот. За овој вирус и во светски рамки се знае малку, затоа е добро да имаме што повеќе податоци“,
рече Филипче.
Тој најави дека друга можност за собирање на повеќе податоци е и широката проверка на населението, како што тоа сега се прави во Дебар.