Во соопштението од Деспотовски се вели дека е охрабрувачки тоа што неговите колеги, иако не се споменуваат имиња, ја промовирале неговата реформска програма која ја претставил пред три години, а со која, како што вели, се воведува директен избор на клучните луѓе на партиски позиции преку непосредни избори
Актуелниот директор на Дирекцијата за технолошки индустриски развојни зони (ТИРЗ), Јован Деспотовски и кандидат за претседател на Социјалдемократскиот сојуз на Македонија (СДСМ) денеска ги повика своите противкандидати за лидерското место во партијата да се придружат на јавна дебата на која ќе ги презентираат идеите и конкретните реформи.
Повикот, кој Деспотовски го упати и пред неколку дена, вели дека доаѓа како одговор на барањата од луѓето со кои се среќавал, но и поради зголемениот интерес на медиумите.
„Нема од што да бегаме, а само преку отворен и транспарентен пристап можеме на луѓето да им дадеме можност да избираат идеи и концепти, а не однапред сервирани решенија“,
се вели во соопштението од Деспотовски.
Во соопштението од Деспотовски се вели дека е охрабрувачки тоа што неговите колеги, иако не се споменуваат имиња, ја промовирале неговата реформска програма која ја претставил пред три години, а со која, како што вели, се воведува директен избор на клучните луѓе на партиски позиции преку непосредни избори.
„Силата е во членството. Нема сервирање ’готови кадри’ туку членството ќе избира кој ќе ги претставува. Ова е единствениот начин како градоначалникот и пратеникот да бидат одговорни кон луѓето, а не кон лидерот“,
вели Деспотовски.
Тој смета дека противкандидатите треба на јавна дебата отворено да кажат кој каков план има за да ги спроведе реформите промовирани од него, а за кои вели дека сега консензуално ги прифаќале. Но, исто така, додава дека тоа е можност и да ги споделат своите идеи за кои ќе се залагаат.
„Јавното соочување е нешто за што секогаш сме се залагале и за кое секогаш сме имале храброст да го бараме од нашите политички противници. Со јавната дебата ќе покажеме дека сме отворени и посветени на фер процес, во кој информацијата, можноста, идејата ќе дојде до што е можно поширок круг на наши членови, а не само на тесен избор на партиски структури. Процесот на избор на претседател на СДСМ е се освен прашање/право на затворен круг на луѓе“,
се додава во соопштението.
Деспотовски додава и дека е подготвен да се приспособи на потребите на останатите кандидати во однос за форматот, времето и местото што ќе го одберат.
Противкандидати на Деспотовски на внатрепартиските избори за шеф на СДСМ се ексминистерката за одбрана и пратеничка, Славјанка Петровска, ексминистерот за здравство и пратеник, Јован Деспотовски и актуелниот заменик-министер за информатичко општество и администрација во техничката влада, Александар Бајдевски, чии кандидатури ги потврди Централната изборна комисија на партијата.
- Филипче ја поднесе кандидатурата за лидер на СДСМ: Одличните релации со Заев и други партиски ексфункционери се предуслов за брзо обединување на партијата
- Ниту една причина за изборниот пораз не смее да остане сокриена, рече Славјанка Петровска откако ја поднесе кандидатурата за шефица на СДСМ
- И заменик-министерот во МИОА во заминување, Бајдевски поднесе кандидатура за лидер на СДСМ
Вчера во Охрид и Струга ексминистерот за здравство и актуелен пратеник во Собранието, Венко Филипче, официјално ја започна својата кампања за внатрепартиските избори. Тој пред членството во овие два града ја претставил својата програма преку која, како што се наведува во соопштението, ветува дека СДСМ ќе биде ефикасна и функционална партиска организација која работи во интерес на членовите и граѓаните.
Првата поголема реформа која Филипче ја презентирал на вчерашните средби е претседателите на општинските организации да се избираат на внатрепартиски избори, исто како што тоа е сега случај со претседателот на партијата.
Само на овој начин, според него, ќе бидат избрани оние што имаат најголема поддршка од членовите на СДСМ. Дополнително, вели тој, оваа реформа ќе доведе до поефикасно лидерство, подобра застапеност на гласовите на членовите на партијата и следствено посилен и пообединет СДСМ.
Изборите за лидер на СДСМ се закажани за 30 јуни и тие доаѓаат откако досегашниот претседател Димитар Ковачевски си поднесе оставка по слабиот резултат што го имаше партијата на парламентарните избори на 8 мај.
За тоа како ќе го вратат СДСМ на нозе, по тешкиот пораз на неодамнешните парламентарни избори четворицата сега и официјални кандидати говореа пред камерата на „360 степени“ за магазинското издание емитувано на МРТ 1.
Инаку, во неделата (9 јуни) СДСМ имаше отчетен конгрес на кој партиските челници требаше да реферираат за тешкиот пораз на парламентарните избори на 8 мај, но истиот беше прекинат бидејќи општинските организации на партијата побарале дополнително време да го анализираат и да се произнесат на ниво на општински изборни штабови и организации за обемниот материјал на извештајот кој бил презентиран од страна на шефот на изборниот штаб и генерален секретар на партијата, Миле Зечевиќ.