Десет дена пред распуштање на парламентот, власта и опозицијата не се ни чекор поблиску до усогласеност за нацрт-законот за јавно обвинителство. ВМРО-ДПМНЕ нема намера да поднесе амандмани. Напротив, Мицкоски го повика Министерството за правда да ги преточи во амандмани забелешките добиени од експертите на јавната расправа. Министерката за правда Рената Дескоска за ТВ Алсат вели дека правниот тим околу Мицкоски го доведува опозицискиот лидер до незгодна ситуација.
„Мицкоски како инженер не е должен да знае, но неговите правници треба да му објаснат дека правна катастрофа е ако се внесат сите забелешки од експертите, од кои некои се противречни меѓу себе“,
вели Дескоска.
И покрај укажувањата на меѓународната заедница за важноста на законот за имиџот на земјава пред ЕУ, опозицијата е на став дека доколку не се прифатат забелешките, подобро е законот воопшто да не се донесе.
„Да барате да се носи закон каде што покрај сегашното одделение за криминал и корупција, каде ќе додате само еден збор и ќе направите ново, буквално со истите ингеренции и каде ќе предвидите сите од она СЈО да ги ставите внатре, е во крајна рака небулозно. И притоа да има буџет неколкупати поголем од сите останати во однос на вработените во обвинителството. Каква порака праќаме во однос на владеењето на правото и правната држава? Ако тоа треба да биде репер како треба да се развива државата, тогаш е подобро да не се носи ова законско решение“,
вели Игор Јанушев – генерален секретар на ВМРО-ДПМНЕ.
Утре работната група составена од претставници на парламентарните партии и експерти уште еднаш ќе се обиде да усогласи верзија на предлог-закон, која подоцна формално треба да се поднесе во Собрание. Усогласеност е потребна оти законот се носи со двотретинско мнозинство.
Министерката Дескоска првично ги повика партиите да достават амандмани до вчера напладне, но дел од нив побарале пролонгирање, поради процесот Жан Моне кој изминатите два дена се одржа во Собранието. Досега само Алијанса за Албанците потврди дека доставиле 8 амандмани на предложеното законско решение, по е-маил.
*поврзана вест: Истрагите на СЈО и „бомбите“ меѓу забелешките што ги истакнува ВМРО-ДПМНЕ повикувајќи се на експертите