Министерката за правда, Рената Дескоска, смета дека по денешното напуштање на средбата откриени се намерите на ВМРО-ДПМНЕ во однос на законот за ЈО.
Таа посочи дека опозициската партија претходно не барала републичкиот јавен обвинител, Љубомир Јовески, да биде поканет на денешната средба, туку дека барањето го изнеле на самиот почеток на состанокот.
Кога се договарал форматот на средбата, рече таа, тие барале да бидат присутни претставници на ЕУ и амбсадата на САД во Скопје, кое барање е прифатено, па на средбата во Собранието беше присутна и меѓународната заедница.
„Форматот на средбата кој би бил поканет надвор од пратеничките групи беше договаран пред да почне средбата заедно со ВМРО-ДПМНЕ. Тие во ниту еден момент не побараа Јовевски или некој друг да биде присутен“,
рече министерката.
Дескоска вели дека иако од опозицијата претходно искажале вкупно девет, во суштина нивната забелешка е една и целта е прекинување на сите постапки поврзани со незаконското следење на комуникациите.
„Жал ми е што постапија така. Но, морам да кажам дека беше и очекувано такво однесување имајќи предвид дека тие едноставно не сакаа да дојдат и пред другите политички партии да го соопштат својот став којшто е практично запирање на предметите од СЈО“,
изјави министерката.
Написмено, сепак, забелешки од ВМРО-ДПМНЕ не се дадени како што била досегашната пракса во меѓусебните договара, а Дескоска смета дека тоа е со цел да не излезат на виделина нивните вистински намери.
Дескоска рече дека им предложила на претставниците на ВМРО-ДПМНЕ, ако ништо друго, барем да останат да ги слушнат забелешките на останатите пратенички групи, но тие и тоа го одбиле.
Во однос на барањето на опозицијата да има јавна расправа, тоа ќе се исполни со оглед на тоа дека министерката најави оти наредната недела ќе се организира и таква дебата. На таа дебата ќе биде поканет и Јовески.
За ставот на независните пратеници министерката рече дека е познат и дека тие веќе го изнеле во јавност.
Дескоска, исто така, кажа дека продолжуваат разговорите за обезбедување двотретинска поддршка на овој закон бидејќи, како што рече, некоректно е да се стави на коцка иднината на овој закон само во рацете на ВМРО-ДПМНЕ. По заминувањето на претставниците на најголемата опозициска партија, продолжила дебатата со останатите политички фактори кои изнеле свои забелешки.
„Тие истакнаа определени заложби за зацврстување на одредени позиции за менување на одредени одредби. Се обврзавме дека наредната недела ќе седнеме уште еднаш прво на јавна расправа, а потоа и подетално ќе има произнесување од сите политички партии“,
најави министерката.
Целата изјава на Дескоска по денешната средба можете да ја погледнете во видеата подолу.
Претставниците на ВМРО-ДПМНЕ уште на самиот почеток на денешната средба го напуштија состанокот, образложувајќи дека на него треба да присуствува и државниот обвинител Јовески.
Своето присуство на денешната средба тие претходно го условија со присуство на претставници на меѓународната заедница.
*Поврзани вести
Независните од ВМРО-ДПМНЕ бараат во Собрание, а не во штабови да се разгледува законот за ЈО
Дескоска попладнево на средба со сите пратенички групи за законот за ЈО