Асистентот по уставно право и политички систем, Денис Прешова, не гледа правни проблеми во тоа што актуелниот премиер Зоран Заев се самопредлага и за министер за финансии. Во изјава за „360 Степени“ тој објаснува зошто ваквото кумулирање на функции не е во спротивност со легислативата.
„Не постојат директни правни пречки за ваквото кумулирање на функциите во рамките на Владата, со оглед на тоа што неспојливоста на функцијата не се однесува на ваква ситуација, додека ваквото кумулирање не е исклучено, поточно не е регулирано во релевантните правни акти“,
анализира Прешова.
Според кадарот на Правниот факултет „Јустинијан Први“ при УКИМ, извршувањето на премиерска и министерска функција не е непознато, притоа посочувајќи ги како примери В.Британија и Израел. Такво нешто, вели Прешова, не е забрането и во домашната правна рамка:
„Постојат неколку примери во компаративната пракса каде кумулирањето на функциите е предвидено или допуштено, особено кога станува збор за претседателите на владите односно премиерите. Од друга страна, прашањето на функционалноста и операционализирањето на ваквото кумулирање на функциите ќе отвори нови дилеми, кои допрва ќе треба да се решат, при што треба да се внимава на раздвојувањето на двете организациони структури, во рамките на министерството и Владата. “
Ставот на Денис Прешова, чија област е уставното право, е сличен на ставот што за „360 Степени“ го даде неговиот колега од катедрата за административно право, професорот Драган Гоцевски. Тој изјави дека иако е невообичаено, нема пречки премиерот да биде и министер. Но, во исто време и предупреди дека чекорот може да биде меч со две острици. Односно дека може да придонесе за подобро спроведување на владините политики, но и дека може да резултира со потешкотии во менаџирањето на функциите.