Иако е мошне невообичаено, во правна смисла не е спорна одлуката на премиерот Зоран Заев да биде и нов министер за финасии. Тоа е мислењето на професорот Драган Гоцевски од катедрата по административно право и администрација на Правниот факултет „Јустинијан Први“ при УКИМ.
Тој додава дека домашното законодавство забранува членови на влада да бидат пратеници или да вршат други јавни областувања како директори или членови на управни одбори. Но, нема забрана првиот човек на владата да биде и министер.
„Не постои изрична пречка носителот на мандатот воедно да преземе обврска да раководи со ресор, односно министерство. Би било проблематично доколку претседателот на владата одлучи да раководи со повеќе од еден ресор или доколку едно лице, член на владата, се избере да раководи со повеќе од еден ресор. Иако и ова прашање не е прецизно уредено.“
изјави за „360 Степени“ Драган Гоцевски
Гоцевски толкува дека член на влада е чисто политичка фукнција, без разлика дали станува збор за премиер, министер или заменик-министер. Акумулацијата на функции во едно лице, додава тој, не е непозната во домашната практика. Впрочем, според законот за владата, премиерот ги избира замениците од редот на министрите.
„Предизвикот што се јавува за претседателот на владата – министер на чело на ресор, е оперативен. Дали ќе може соодветно да ги врши сите должности и како претседател на владата да раководи со целата работа на владата? Да остварува соработка со другите органи, јавни претријатија и установи, да посвети доволно внимание. Како шеф на ресор – да раководи со него на секојдневна основа и да ја следи и координира активноста на сите чинители во ресорот. Исто така, се зголемува и одговорноста – да одговара и за целата работа на владата и за состојбите во ресорот, пред самата Влада и пред Собранието.“
додава Гоцевски
Според професорот Гоцевски, Зоран Заев законски на располагање ќе има повеќе алатки за да го „олесни“ притисокот врз себе.
„Во поглед на раководењето со министерството за финансии, и од позиција на министер, но повеќе од позиција на претседател на Владата, може да овласти државен секретар и раководни државни службеници да вршат дел од работите, а може да развие и соработка со заменик-министерот за финансии.“
оценува Драган Гоцевски
Според Гоцевски, одлуката на Заев да биде и министер за финасии може да се покаже како лоша доколку има потешкотии во менаџирањето на функциите. Но, може да биде и добра, ако тоа значи потесно следење и доследно спроведување на владините финансиски и други политики.
Додека кај нас е невообичано премиерот да води и министерски ресор, Гоцевски потсетува дека во соседството тоа не е толку ретко. Пример е грчкиот премиер Алексис Ципрас, кој го презеде ресорот за надворешни работи по оставката на Никос Коѕијас. Сепак, набрзо беше избран нов шеф на дипломатијата – Јоргос Катругалос.