Демократскиот сојуз го осудува физичкиот напад на новинарот Љупчо Златев и заканите кон новинарката Мирослава Бурнс и ги повикува надлежните органи да ги откријат напаѓачите и жестоко да ги казнат.
„Брзото откривање на сторителите е од највисок интерес зашто во двата случаи е јасно дека станува збор за загрозување на слободата на печатот и обид за замолчување на истражувачките новинари кои откриваат злоупотреби на функционерите на власта, корупција и организиран криминал. Нападите против новинарите не се својствени за демократско општество и за држава која треба да ги отпочне преговорите за членство во Европската унија поради што ги повикуваме политичките елити од власта и опозицијата да престанат со сатанизирачкиот политички вокабулар кој за радикалните поединци и недопирливи структури од подземјето е сигнал за физичка пресметка со неистомислениците“,
се вели во нивното соопштение.
Демократскиот сојуз го поддржува Здружението на новинари во Македонија во барањето законски измени со цел нападот врз новинари да се смета како напад врз службено лице и соодветно ригорозно да се казнува.
„Слободата на печатот и заштитата на новинарите се врвен приоритет во едно демократско општество и очекуваме лошата слика и пракса во Македонија веќе да не се повторува“,
се вели во соопштението.