По низата реакции за можните решенија за иднината на Универзална сала, со критика излезе и поранешната претседателка на Асоцијацијата на архитекти, Сања Раѓеновиќ-Јовановиќ.
Таа посочува дека со распишаниот јавен конкурс за избор за идејно решение со кое би се градела летна сцена и парк на местото кај Универзална сала, дебата за оваа установа се завршила уште пред да почне и дека јасно е дека Универзална ќе се руши.
„Наместо после целата конфузија и различни и противречни изјави градот да иницира стручна дебата на оваа тема за да се судрат мислењата и спротивставените ставови и на граѓаните и на архитектите, со цел да се дојде до најдобро решение и потоа распише конкурс, Градот почнал од обратната страна, веќе распишал конкурс за избор на архитектонско и хортикултурно решение за отворена летна сцена со парк ‘Универзална’, правдајќи се со ААМ. Комисијата е во состав и тоа со шест члена: Маја Дончева, Бесник Осеку, Снежана Митоска, Александар Јанакиески, Аљоша Шопар и Никола Наумоски. Идеите треба да се достават до 28 август годинава. Ова значи дебатата заврши и пред да почне, а Универзална ќе се руши. Пред неполн месец заврши конкурсот распишан од Град Скопје и избрани се идејни решенија за три летни сцени во Градскиот парк. Па човек да си помисли дека најлесно и најбезболно, а и најевтино е направи летна сцена, зазелени околу и сите среќни. Скопје ќе се наполни со летни сцени, како Владата со советници или државава со аналитичари“
вели Јовановиќ во својот текст објавен на порталот „Порта3“.
Поранешната претседателка на Асоцијацијата на архитекти во својот текст хронолошки ги објаснува сите неуспшени проекти за обнова на Универзална сала. Коментирајќи ги објаснувањата на Град Скопје, кој утврдил дека има потреба од поголема сала која не може да се гради на истата локација, Јовановиќ вели дека изградба на нова сала на нова локација е една работа, а реновирање на Универзална е друга.
Според неа, конфузен е и ставот на Асоцијацијата на архитекти, на чија иницијатива беше распишан конкурс за избор на идејно решение за изградба на летна сцена и парк на местото од Универзална, а од каде што преку соопштение до јавноста, појаснија дека причина било што Градот предложил сала од поголем обем, а проблем биле и финансиите за реконструкција.
„Дали градоначалникот се обиде да ја злоупотреби ААМ во своја корист правдајќи се зошто распишал конкурс за Универзална, останува сомнително. По бурата во јавноста, ААМ вчера се огласи со едно конфузно соопштение каде информираат за разговорите водени со градот. Велат дека конкурсот од 2013 покажал дека за толкав објект нема место на локацијата и дека ставот на ААМ бил дека „Универзална сала треба да остане во целост таква каква што е и да се реставрира во нејзиниот постоен облик“ и тука треба да заврши оваа тема. Градот ги известил дека пари за реновирање нема и дека имаат потреба од нова сала за која ААМ посочила локација, и тоа е во ред, но ова е друга тема. Потоа во продолжение велат дека откако биле информирани дека нема средства „предложивме просторот каде што е сместена Универзална сала да прерасне во јавен простор кој што ќе биде дефиниран по распишување на анкетен конкурс со што би се добиле идеи за негово идно функционирање и планирање“!? За на крај повторно да повикаат да се реновира салата..“,
пишува Јовановиќ.
Според неа, Универзална треба да се реновира затоа што, како што вели, таа е иконичен објект и симбол на градот.
„ДУП Буњаковец 2 направи проблеми, но да го спасиме она што можеме. Скопје, како и сите современи градови, се залага за што помалку користење автомобили, а што повеќе јавен превоз. Од градот велат дека се на праг да направи трамвајски превоз -„Бас рапид транзит“ кој трамвај ќе доаѓа на секој 3-4 минути и студијата покажала дека за 40 отсто ќе се зголеми користењето на јавниот превоз. Па така според најавите на трасата, локацијата на Универзална е на одлично место, веднаш до трамвајската станица. И на ‘Ноу Камп’ во Барселона најголем број на посетителите одат со јавен превоз“,
посочува таа.
Од Град Скопје, пак, уверуваат дека сите опции се на маса и дека за Универзална сè уште нема конечна одлука. Скопскиот градоначалник Петре Шилегов на денешниот брифинг рече дека распишаниот конкурс не мора да се спроведе и дека лично се залага Универзална сала да се реставрира, а на друга локација да се гради нова сала.