За втората ИЕ, како и за „тројката“ и „четворката“, не се предвидени промени на границите со предлог-измените што попладнево се пуштени во собраниска процедура
Општините Дебар и Маврово-Ростуше се селат од шестата во петтата изборна единица, според измените во Изборниот законик што попладнево стигнаа во парламентот, а се предложени од координаторите на пратеничките групи на СДСМ, ВМРО-ДПМНЕ и на ДУИ.
Сè до денеска беше неизвесно дали воопшто измените на Изборниот законик ќе влезат во собраниска процедура на само неколку дена пред распишување на изборите, а уште понеизвесно беше дали промените ќе се однесуваат и на границите на изборните региони – на што инсистираше ДУИ, а СДСМ тврдеше дека сега нема време за тоа. Сепак, измените стигнаа денеска во парламентот, по скратена постапка, и веројатно усогласени меѓу трите најголеми партии во Собранието. Со нив се интервенира во близу 60 члена од Изборниот законик, кој, според објаснувањата, се усогласува со препораките на ОБСЕ/ОДИХР од мониторингот на последните изборни циклуси во земјава.
Иако од ДИК имаше укажувања за отстапувања во бројката на гласачи во четири од вкупно шест изборни единици, овој пат, со измените, се интервенира единствено во „шестката“, која ги опфаќа Тетово, Гостивар, дел од Кичево… од каде што се селат гласачи во петтата ИЕ. За таму беше посочено дека „прагот“ на гласачи е надминат за 8,60 проценти.
Како изборна единица со поголем број гласачи од дозволеното е посочена и „двојката“, во чиј состав се Куманово и дел од општините во Скопје. Таму надминувањето е 5,74 проценти. Помал број избирачи има во четвртата ИЕ (Струмица, Прилеп…) и тоа за 6,36 проценти и во третата ИЕ (Велес, Штип…) за 7,64 проценти. Во граница на „нормалата“ се единствено првата (скопска) ИЕ и „петката“ (Охрид, Струга, Битола…), каде што сега се селат Дебар и Маврово-Ростуше, за да се намали бројката на гласачи во шестата ИЕ.
Дебар е општина во која на последните избори – во 2019 година се е евидентирани околу 18,5 илјади гласачи. Во Маврово, пак, на последните избори беа запишани 9,8 илјади гласачи. И во двете општини одѕивот на претседателските избори во 2019 беше многу низок, односно под 30 проценти.
За втората ИЕ, како и за „тројката“ и „четворката“ не се предвидени промени на границите со предлог-измените што попладнево се пуштени во собраниска процедура.
Измените на Изборниот законик се додадени во дневниот ред на 136. седница, заедно со предлогот за разрешување на министерката за труд и социјална политика Рашела Мизрахи. Седницата, како што е најавено, треба да почне по завршувањето на расправата за законот за јавно обвинителство. Откако ќе се утврди потребата за донесување на измените на Изборниот законик по скратена постапка, треба да заседава Комисијата за политички систем, каде што ќе има можност за поднесување амандмани.
Последната седница е закажана за в недела во 12 часот и единствена точка на дневниот ред е предлогот на спикерот Талат Џафери за распуштање на парламентот, со цел одржување избори на 12 април.