Во одговор објавен вчера на пратеничко прашање, поставено уште на 5 ноември 2019 година, француската државна секретарка за европски прашања не е прецизна во однос на ставот на Франција за можно отворање преговори со Скопје и Тирана ниту, пак, за датумот кога би можело да се случи тоа, иако зборува за периодот пред Самитот ЕУ-Западен Балкан во мај
Од содржината на одговорот, очигледно е дека тој е напишан пред објавувањето на мини-извештаите на ЕК за Северна Македонија и Албанија, иако е објавен дури вчера, еден ден откако Комисијата ги презентираше мини-извештаите
Франција ќе ја донесе својата одлука за Северна Македонија и Албанија врз основа на проценката на Европската комисија за спроведените реформи и исполнувањето на критериумите, одговори државната секретарка за европски прашања Амели де Моншалан, на пратеничко прашање за ставот на Париз за отворање на преговорите на ЕУ со овие две земји. Одговорот е објавен вчера, а е напишан пред објавувањето на мини-извештаите на ЕК за Скопје и за Тирана, што е очигледно од тоа што Де Монашалан зборува дека Комисијата во наредните недели ќе излезе со оцена, а тоа веќе се случи во понеделникот.
Францускиот пратеник од редовите на мнозинската Република во движење, Ксавиер Палузукиевич, како што јави МИА од Париз, прашал зошто Франција особено се спротивставила на почеток на преговорите со Северна Македонија на состанокот на Европскиот совет лани во октомври. Притоа, пратеникот инсистирал од француската влада да објасни зошто земјава не ги исполнила условите за влез во Унијата, во споредба со другите држави кои се во фаза на преговори за пристапување како Србија или Црна Гора.
Амели де Моншалан му одговорила дека во оваа пригода земјите-членки не нашле едногласен договор за започнување преговори со Северна Македонија и Албанија поради неколку различни позиции, особено во врска со нецелосноста на актуелниот процес за пристапување, за напредокот што треба да го постигнат овие земји во бараните реформи, за можните дополнителни услови или модалитети за отворање на преговори или дури и по можноста за започнување преговори само со едната или двете земји.
Конкретно за нашата земја, Амели де Моншалан во одговорот до францускиот пратеник, очигледно подготвен пред објавувањето на извештајот на Европската комисија, нагласува дека Франција ја признава вредноста на историскиот договор од Преспа со кој се реши голем билатерален спор меѓу Грција и Северна Македонија и дека тој претставува голем чекор напред за стабилност во регионот.
Таа потсетува дека новата Европска комисија на 5 февруари годинава презентира предлози за голема реформа на пристапниот процес, кој ги опфаќаат предлозите што ги предложи Франција во есента лани. Сега, според Моншалан, ќе има дискусија во Советот на Европската Унија пред Самитот во Загреб во мај 2020 година.
„Франција ќе биде претпазлива во врска со спроведувањето на овие предлози и одржувањето на нивото на амбицијата на оваа реформа пред да се започне со преговори. Покрај тоа, врз основа на проценката на Европската комисија за спроведените реформи во Северна Македонија и Албанија за исполнувањето на критериумите утврдени од Советот, Франција ќе донесе одлука“,
вели француската државната секретарка за европски прашања.