Пендаровски, по денешната средба на Советот за безбедност, рече дека нема ништо спорно во средбата со претставници на ОМО „Илинден“ и дека тоа не е спротивно на Договорот за добрососедство од 2017 година. Тој уште додаде дека не е негов проблем ако некому му пречат неговите средби со Македонците каде било во светот
Претседателката на Бугарската социјалистичка партија, која е вицепремиерка и министерка за економија во бугарската влада, Корнелија Нинова, одби денеска да учествува на првиот состанок на Работната група за економија, трговија и иновации меѓу Македонија и Бугарија, објавија повеќе бугарски медиуми повикувајќи се на БГНЕС.
Претходно, поради средбата на Пендаровски со претставници на македонското здружение во Бугарија ОМО „Илинден“, реагираше и бугарското Министерство за надворешни работи.
„Неколку дена по успешната заедничка средба на владите на двете земји, повторно сме сведоци на зголемување на тензиите во јавноста предизвикани од конкретни постапки на претседателот на Северна Македонија, кој се обидува да ги обнови темите кои се во конфликт со Договорот за пријателство, добрососедство и соработката од 2017 година. Ваквите дејствија не придонесуваат за изнаоѓање решенија за политички прашања во насока на забрзување на процесот на европска интеграција на Северна Македонија“,
се вели во соопштението на бугарското МНР.
Претседателот Пендаровски по денешната средба на Советот за безбедност рече дека нема ништо спорно во средбата со претставници на ОМО „Илинден“ и дека тоа не е спротивно на Договорот за добрососедство од 2017 година. Тој уште додаде дека не е негов проблем ако некому му пречат неговите средби со Македонците каде било во светот.
„Јас дадов и јавно соопштение и коментар на тоа соопштение. Морам да ви кажам дека ме изненади затоа што во тоа соопштение освен констатација немаше аргумент. Дали некому воопшто пречи самата средба затоа што од соопштението кое јас го дадов и изјавите кои ги имавме и јас и луѓето кои беа кај мене на средба, произлегува за што сме зборувале и таму нема ништо спорно. Ниту една точка и запирка од изјавеното од моја и од страна на моите соговорници не оди контра Договорот од 2017 година. Ако некому му пречи самата средба на претседателот на Република Северна Македонија со Македонци каде било во светот, тоа е друга работа и тоа не е мој проблем. И не би требало да биде наш проблем“,
рече Пендаровски.
Денеска во Скопје на првиот работен состанок на Работната група за економија, трговија и иновации се сретнаа македонскиот министер за финансии Фатмир Бесими и бугарскиот министер за иновации и раст Даниел Лорер. На средбата беше заклучено дека Македонија и Бугарија имаат исти цели, а тоа е економски раст и подобар животен стандард.
Меѓу другото, двајцата министри наведоа дека конкретно е договорено да се воспостави механизам за заштита на инвеститорите од двете земји.