Марихуаната треба да се декриминализира и веќе доцниме со заокружување на легислативата за производство и дистрибуција на маслото од канабис за медицински цели, за што постои јасна стручно-медицинска поддршка. Но, за создавањето на законски претпоставки за комерцијална продажба на марихуаната одлуката не треба да се носи брзо и таа дебата треба да се води во стручните, а не во политичките кругови, смета претседателот Стево Пендаровски
Во интервју Дојче веле претседателот на државата, запрашан за став за поширокиот економски пакет, за кој премиерот Заев верува дека ќе ја живне домашната економија, меѓу другото, и со легализација на марихуаната, вели дека пред извесен период премиерот го запознал со некои од тие проекти и притоа заеднички констатирале дека дел од нив можат да бидат потенцијално ризични во случај ако за нив нема поширока поддршка од стручната јавност и разбирање од граѓаните,
„Мој став е дека марихуаната треба да се декриминализира затоа што децении наназад ние се фокусиравме со ист интензитет на казнување и на оние што ја користат дрогата за лични потреби и на оние што ја дистрибуираат. Исто така, сметам дека веќе доцниме со заокружување на легислативата за производство и дистрибуција на маслото од канабис за медицински цели, за што постои јасна стручно-медицинска поддршка. Меѓутоа, имам лична резерва кон создавањето на законски претпоставки за комерцијална продажба на марихуаната и сметам дека, прво, одлуката не треба да се носи брзо и второ, дека таа дебата треба да се води во стручните, а не во политичките кругови. Притоа, најбитно е во анализите да не биде калкулиран само економскиот профит, туку и евентуалните последици по здравјето на младите, како и можноста на тој начин да ја отвориме вратата за полесен влез на меѓународните наркокартели во нашата земја“,
вели претседателот Пендаровски.
Премиерот Зоран Заев пред една недела исто така во интервју за Дојче веле рече дека планот за декриминализација и легализација на марихуаната е дел од поширок економски пакет со кој сака да ја стимулира домашната економија.
„Идејата е да се даде можност во туристичките места, вклучително и Скопје, кафулињата, постојни и нови, со почитување одредени стандарди – вентилација, доказ за потекло на марихуаната и сл., да се овозможи консумација на марихуана внатре во нив“,
вели Заев.
Тој додаде дека стандардите ќе бидат исти за сите и секој ќе може да аплицира. Тој притоа ги спомена туристички места Струга, Охрид, Ресен, Дојран, Скопје, Берово, Маврово…