Oд денеска почнува кампања за вакцинација, при што цел ќе бидат ризичните групи граѓани кои или не се целосно вакцинирани или не примиле засилувачка доза, а тоа се: лицата над 65 години со хронични болести и лица под 65 години, но со повеќе хронични болести
Комисијата за заштита од заразни болести на денешната редовна седница одлучила да ѝ препорача на Владата да се укинат ковид-сертификатите како услов за влез во трговските центри, односно онаму каде што се носат маски, додека во рестораните каде се служи храна и пијалаци и каде што се вадат маските, гостите мора да поседуваат ваков документ.
Претседателот на Комисијата Александар Петличковски на прес-конференцијата рече дека ова е еден чекор кон внимателно олеснување на рестриктивните мерки, а за тоа што натаму ќе се презема ќе се следи состојбата за да не дојде до влошување.
Членот на Комисијата и портпарол Злате Мехмедовиќ најави дека од денеска почнува, како што рече, силна кампања за вакцинација, при што цел ќе бидат ризичните групи граѓани кои или не се целосно вакцинирани или не примиле засилувачка доза, а тоа се: лицата над 65 години со хронични болести и лица под 65 години, но со повеќе хронични болести.
Тој истакна дека се одлучиле на ваква мерка бидејќи вакцинацијата кај нас е на многу ниско ниво, или околу 40 отсто од целокупното население е целосно вакцинирано.
„Од денеска сите кои не се целосно вакцинирани или немаат примено засилувачка доза, а се во ризичните групи ќе добиваат СМС-пораки со точен термин и пункт за вакцинација. Очекуваме добар одговор и да го подигнеме процентот на вакцинирани“,
рече Мехмедовиќ.
Тој тука ја истакна неопходната соработка меѓу јавното и приватното здравство, односно вклученоста на матичните лекари кои треба да им ги објаснуваат бенефитите од вакцинацијата и ризиците од невакцинираност.
„По овој бран на омикрон, може да се каже овие лица се во најризичната група и на ваков начин ќе се спречат компликации. Бројките се дека има околу 260 000 граѓани во оваа ризична група, од кои 130 000 не се целосно вакцинирани, а другите 130 000 немаат примено трета доза“,
рече Мехмедовиќ.
Тој најави дека доколку процентот на вакцинација се зголеми тоа ќе биде основа за натамошно олеснување на рестриктивните мерки.
„Идејата е да се стимулира вакцинацијата преку таква мерка и затоа треба прогресивна кампања за бенефитите од вакцинацијата и ризиците од болеста“,
рече тој.