Премиерот ги повика пратениците да го разгледаат Законот за банки во делот на провизии и да утврдат дали може да се направи интервенција во однос на висината на апсолутниот износ на профитот на банките што доаѓа од некаматни приходи
На денешната собраниска седница за пратенички прашања пратеникот Димитар Апасиев од Левица праша дали се планира да им се забрани на банките да наплаќаат нереални провизии за административни трошоци, провизии за аплицирање, како и за надоместоци за обработка на кредит.
Премиерот Димитар Ковачевски ги повика пратениците без исклучок, вклучувајќи ги од СДСМ, да го разгледаат Законот за банки во делот на провизии и низ јавна расправа во Собранието да се утврди дали може да се направи интервенција во однос на висината на апсолутниот износ на профитот на банките што доаѓа од некаматни приходи. Ковачевски од собраниската говорница кажа и дека се во подготовка измени на Законот за финансиски друштва.
Апасиев рече дека банкарите се оставени без никаков надзор и за една година им е зголемен профитот.
„Стопанска банка АД Скопје за 16 милиони евра го зголемила профитот само по основ на провизии, а Комерцијална банка над 16 милиони,
рече Апасиев.
Тој праша дали НБРМ планира да им забрани на банките плаќање провизии и до премиерот Димитар Ковачевски дали Владата планира да ја намали казнената камата.
Вицегувернерот на Народната банка, Фадил Бајрами, изјави дека централната банка работи согласно законите што се во сила.
„Ако има иницијативи за измени на овие закони може да се предвидат измени во таа насока. Во цел свет банките се приватни и имаат свои тарифи и постапки. Пред неколку месеци Собранието го донесе законот за систем за исплати и им даде можност на други финансиски институции банкарски и небанкарски, и кога ќе влезат во конкурентност тоа ќе влијае да се намалат провизиите“,
рече Бајрами.