„Има одредени домови, па и правни лица, во кои има енормно висока потрошувачка на струја, и тоа е речиси 100 отсто, поради копање крипто-валути. Тоа треба да прекине зашто таа електрична енергија е субвенционирана од сите граѓани“, изјави премиерот
Премиерот Димитар Ковачевски денеска апелираше да не се копаат крипто-валути зашто потрошувачката на електрична енергија при овој процес е енормно голема, што води до непродуктивни загуби на струја.
„Има одредени домови, па и правни лица, во кои има енормно висока потрошувачка на струја и тоа е речиси 100 отсто поради копање крипто-валути. Тоа треба да прекине зашто таа електрична енергија е субвенционирана од сите граѓани. Субвенцијата која на финалната цена ја плаќаат граѓаните е 80 отсто, но кога ќе кажете 80 отсто значи дека ако не е субвенцијата граѓаните треба да платат пет пати повисока цена. Секое неразумно непродуктивно и несовесно трошење предизвикува недостиг, дополнителни буџетски издатоци и недостиг во снабдувањето со електрична енергија на оние на кои им е потреба за најважните лични и деловни потреби“,
рече Ковачевски одговарајќи на новинарски прашања по седницата на Советот за безбедност.
Прашан зошто не се следи косовскиот пример кој законски забранува копање крипто-валути, Ковачевски одговори дека за тоа е потребно носење законско решение.
„Да, може, но за тоа мора да се донесе законско решение. Сè додека не се донесе законско решение, ќе мора да се оди со апел, а доколку се работи за компании, односно за правни лица, знаете дека воведовме тарифирање во блокови, па ако е голема потрошувачката преминуваат во друг блок. Во овој период не треба да се прави тоа поради недостигот на електрична енергија. Споредби со соседни држави е добро да се прават, јас сум во комуникација со сите, но секој има своја специфика. Косово моментно е во тешка ситуација и таму веќе се почнати рестрикции“,
изјави премиерот.