Чулев вели дека како технички министер на МВР не бил информиран за набавката на софтверот и дека нејасно е зошто е купен, кога, како што тврди, МВР спроведува своја постапка за набавка на хардверско и софтверско надградување на проектот „Безбеден град”
Премиерот Зоран Заев пак, рече дека има докази дека имало комуникација меѓу Генералниот секретаријат и МВР, токму поради постапките и можноста за тестирање на системот
Поранешниот технички министер за внатрешни работи, Наќе Чулев, на својот Фејсбук – профил реагираше за случајот со набавката на софтверот за изрекување на казни за сообраќајни прекршоци, кој како што објави „360 степени“, уште лани во февруари го набавил Генералниот секретаријат на Владата кога со него раководеше Драги Рашковски, а кој и по осум месеци откако е платен, се уште не е во функција.
Чулев кој во тоа време беше министер за внатрешни работи во техничката влада, вели дека тој не знаел дека софтверот е набавен.
„Во врска со случајот за набавка на софтвер за детектирање на сообраќајни прекршоци, со оглед дека беше споменато и Министерството за внатрешни работи во периодот кога раководев со истото, а со цел прецизирање на работите и утврдување на вистинската фактичка состојба, сакам да ја информирам јавноста за следното: Во периодот додека ја извршував функцијата министер за внатрешни работи во ниту еден момент не бев информиран дека Генералниот секретеријат на Владата извршил набавка на софтвер за детектирање на сообраќајни прекршоци, ниту пак е побарано од МВР спецификација за набавка на ваков софтвер, проблематика која е единствено во делокругот на надлежности на МВР, а не на други институции. Никаков софтвер не е примен во МВР во периодот додека бев министер. Уште повеќе, никогаш на Влада или на било каква владина работна група не е дискутирано или имало било каква координација за законски промени со цел примена на наведениот софтвер. Ниту тогашниот премиер, ниту генералниот секретар или било кој друг не ме информирале дека ваков софтвер е набавен“,
пишува Чулев.
Тој вели дека е нејасно зошто е купен софтвер, кога, како што тврди, МВР спроведува своја постапка за набавка на хардвер и софтвер за надградување на проектот „Безбеден град“.
„Не ми е јасно зошто Генералниот секретеријат спровел набавка на вакво софтверско решение, со оглед дека Министерството за внатрешни работи, раководено од тогашниот министер, Оливер Спасовски, во истиот период спроведува постапка за набавка на хардверско и софтверско надградување на проектот ‘Безбеден град’, кое вклучува и софтвер за сообраќајни прекршоци, посебно ако се има предвид дека производителот и одржувач на ‘Безбеден град’ со кој МВР има склучен договор, не дозволува инкорпорирање на надворешни софтверски решенија“,
напиша Чулев.
Претходно денеска, премиерот Зоран Заев, одгварајќи на новинарско прашање на прес-конференцијата во Владата рече дека има докази за комуникација меѓу Генералниот секретаријат и МВР, токму поради постапките и можностаза тестирање на системот.
„Дадов насоки да се расчисти работата од позитивен аспект, затоа што е нешто што се спроведувало и за време на техничката Влада. Видов докази дека имало комуникација меѓу Генералниот секретаријати Министерството за внатрешни работи, токму поради постапките, информациите, можноста за тестирање на самиот систем. Ќе има соопштение од Владата со сите детали за набавката на софтверот, решенијата кои всушност јас и ги видов како изгледаат во целата оваа постапка“,
рече Заев.
Премиерот рече дека побарал од службите да ги соберат сите документи од набавката на софтверот што ја спровел Генералниот секретаријат. Вели дека не се сомнева во процесот на набавка, но дека деталите ќе бидат објавени јавно.
За расчистување на околностите во кои е набавен софтверот Антикорупциската комисија денеска најави дека ќе отвори предмет по допрен глас од меидумите.