Видов докази дека имало комуникација меѓу Генералниот секретаријат и МВР, токму поради постапките и можноста за тестирање на самиот систем, вели премиерот за набавката што била спроведена додека Рашковски беше генерален секретар на Владата
Премиерот Зоран Заев, побарал од службите да ги соберат сите документи од набавката на софтверот што ја спровел Генералниот секретаријат кога генерален секретар на Владата беше Драги Рашковски. Заев вели дека не се сомнева во процесот на набавка, но сепак вети дека деталите ќе бидат објавени јавно.
Како што објави „360 степени“, Драги Рашковски, како генерален секретар на Владата, набавил софтвер за следење на сообраќајни прекршоци за потребите на МВР, со народни пари, а во Министерството не знаат ниту дека тој постои.
„Секако дека исклучувам сомнеж во набавката, тоа е направено колку што се сеќавам со ФИНКИ, со тендерска процедура. По информацијата во јавноста се обратив до службите да ме информираат барем усно, чекам да ми стигнат документите. Постапката била предвидена со буџет од 8 милиони денари, имало компетитивност, но сè уште не ги знам детали…Спроведена е целосна постапка“,
рече Заев одговарајќи на новинарско прашање.
Огласот, како што веќе објави „360 степени“ бил распишан во ноември 2019 година, се пријавиле три фирми, а со победникот „Инвока гроуп“ бил потпишан договор вреден околу 81 000 евра во февруари 2020 година. Софтверот, кој треба да одредува брзина, локација, регистарска табличка и да регистрира прекршоци, како на пример, поминување на црвено, требало да биде испорачан најдоцна во јули 2020 година.
„Дадов насоки да се расчисти работата од позитивен аспект, затоа што е нешто што се спроведувало и за време на техничката Влада. Видов докази дека имало комуникација меѓу Генералниот секретаријати Министерството за внатрешни работи, токму поради постапките, информациите, можноста за тестирање на самиот систем. Ќе има соопштение од Владата со сите детали за набавката на софтверот, решенијата кои всушност јас и ги видов како изгледаат во целата оваа постапка“,
рече Заев.