Членовите на КСЗД го информирале претседателот Пендаровски за тековните предизвици во нивната работа, неопходноста од обезбедување на поголема финансиска независност на институцијата и потребата од кадровско јакнење на Комисијата, пишува во соопштението од кабинетот на шефот на државата
Претседателот Стево Пендаровски денеска ги прими претседателката на Комисијата за спречување и заштита од дискриминација (КСЗД), Весна Бендевска, и членови на комисијата.
Како што соопштија од неговиот кабинет, на средбата претставниците на Комисијата го запознале Пендаровски со нивната тековна работа, досегашното постапување по поднесени претставки, промоција на човековите права и елиминирање на сите видови дискриминација. Покрај тоа, претставниците на Антидискриминациска му се пожалиле на Пендаровски за тековните предизвици во нивната работа, неопходноста од обезбедување на поголема финансиска независност на институцијата и потребата од кадровско јакнење на комисијата.
„Претседателот Пендаровски ја истакна важноста на работата на комисијата во насока на превенција и заштита од дискриминација, а во функција на остварувањето на човековите права и слободи. Тој додаде дека е потребно да се користат механизмите кои ги нуди Законот за спречување и заштита од дискриминација кој овозможува поширока основа за превенција и заштита на граѓаните. Тој ги поздрави напорите на Комисијата за подигање на јавната свест, информирање и едукација на граѓаните за видовите на дискриминација со кои се соочуваат, како и понудената поддршка од страна на Комисијата за превенција и заштита од дискриминација“,
се наведува во соопштението.
Комисијата за спречување и заштита од дискриминација доби трипати помал буџет за 2022 г. од бараниот. Пред да се преселат во сегашните простории, кои патем се непристапни за лица со попреченост, КСЗД заседавала во Клубот на пратеници, што се смета за „неутрален терен“. И сега состаноците се одржуваат на мебел дониран од холандската амбасада.