Четворица членови на грчкиот спасувачки тим испратен во Либија загинаа во сообраќајна несреќа, пренесоа светските агенции.
Четворицата Грци загинаа веднаш по пристигнувањето во Либија за да учествуваат во операциите за пребарување и спасување во областите погодени од поплавите.
Несреќата се случила кога грчкиот тим составен од вкупно 19 лица бил на пат од Бенгази кон Дерна.
„Во несреќата се повредени 15 лица, од кои седум се во тешка состојба“, изјави министерот за здравство во владата на истокот на Либија, Осман Абделџалил.
Од Министерството за надворешни работи на Грција соопштија дека по сообраќајната несреќа „во координација со Министерството за национална одбрана, ОН и Европската Унија, генералниот конзулат на Грција во Бенгази е во состојба на готовност за обезбедување помош за делегацијата и да помогне во враќањето во Грција“.
Инаку, Грција денеска испрати хуманитарна помош во Либија, односно медицински и болнички персонал, медицинска и фармацевтска опрема и храна.
Силната бура наречена Даниел ја зафати Либија пред осум дена, откако претходно мина низ Грција, Бугарија и Турција. Две брани пукнаа во планините над пристаништето Дерна, уништувајќи големи делови од градот со 100 000 жители.