Американскиот и францускиот претседател му честитаа на новоизбраниот бразилски претседател Луис Инасио Лула да Силва
Американскиот претседател Џо Бајден му честита на новоизбраниот бразилски претседател Луис Инасио Лула да Силва за неговата победа на „слободни, фер и кредибилни избори“.
Бајден рече дека со нетрпение очекува да продолжи соработката меѓу нивните две земји.
На изборната победа на Лула да Силва му честита и францускиот претседател Емануел Макрон, кој во објава на Твитер напиша дека ќе ги обнови врските на пријателството меѓу земјите.
Лидерите на грчките опозициски партии СИРИЗА и ПАСОК – Движење на промена Алексис Ципрас и Никос Андрулакис преку своите официјални твитер-профили ја поздравија победата на Луис Инасио Лула да Силва на претседателските избори во Бразил истакнувајќи дека e победа на демократијата и социјалната правда.
Ципрас испрати честитки до Лула и порача дека победата над екстремната десница, и покрај сите пречки, е победа на демократијата/социјалната правда и борбата на левичарските и прогресивните сили ширум светот.
Лидерот на ПАСОК – Движење на промена напиша дека победата е знак на надеж за народот на Бразил, надеж за почитување на демократските институции, владеењето на правото, но и за поголема социјална правда. Тој додаде дека поразот на Болсонаро го отвора патот за подобра и искрена соработка со Европската Унија.