Вицепремиерот за европски прашања се обрати на француски јазик и со очекување дека неговата порака ќе стигне до сите Французи
Вицепремиерот за европски прашања Бујар Османи, пред утрешното заминување во работна посета на Франција, се обрати со видеопорака на француски јазик, за која смета дека треба да стигне до сите сите Французи.
Тој вели дека со шефот на дипломатијата Никола Димитров заминуваат на историска посета на Париз, во пресрет на европските пролетни самити, кога Северна Македонија очекува одлука за започнување на преговорите со Европската Унија.
„По октомврискиот неуспех, се појави и лажен впечаток дека постојат разлики во нашите заеднички интереси, во нашата заедничка цел да обезбедиме посилна, постабилна и пообединета Европа. Денеска, кога пред нас ја имаме новата методологија за преговори, се отстранува и последната пречка за остварување на нашите заеднички цели“,
посочува Османи во видеопораката.
Тој вели дека утре во Париз очекува да се потврди поддршката на Франција за европската интеграција на Северна Македонија, со што ќе се отвори патот за почеток на преговорите со Унијата на идните самити.