Претходно, претседателот на Бугарија, Румен Радев, изјави дека инцидентот во Полска е неприфатлив, претставува ризик за дестабилизација на целиот регион и за проширување на територијалниот опсег на војната на Русија против Украина
Бугарскиот премиер Галаб Донев најави дека ќе го свика Советот за безбедност на преодната влада, при што ќе се расправа за заканите од ескалација на конфликтот во Украина откако вчера Полска беше погодена од проектили.
Средбата во Софија ќе се одржи по состанокот на НАТО што го побара Варшава, на кој треба да се разговара за активирање на членот 4 од Договорот на Алијансата, според кој, на секоја членка ѝ е дозволено да бара консултации со остатокот од Алијансата доколку нејзиниот територијален интегритет, политичката независност или безбедност се загрозени.
Бугарскиот премиер Донев изјави дека секој непромислен збор може да донесе ризик од ескалација на конфликтот и убивање невини луѓе и порача дека сè што се кажува треба да биде засновано на факти.
Денеска ќе има состанок на двете парламентарни комисии за надворешни работи и одбрана на бугарскиот парламент, на кој ќе присуствуваат вршителите на должноста министри за надворешни работи Николај Милков и за одбрана Димитар Стојанов, како и раководителите на бугарските специјални служби.
Претходно, претседателот на Бугарија, Румен Радев, изјави дека инцидентот во Полска е неприфатлив и е ризик за дестабилизација на целиот регион и за проширување на територијалниот опсег на војната на Русија против Украина.
Според Радев, потребно е итно расветлување на случајот и преземање соодветни мерки.
„Секој ден од оваа војна ја уништува иднината на Европа и на светот“,
рече Радев и додаде дека одржувањето на современите одбранбени капацитети и зачувувањето на единството во Алијансата се од клучно значење за зачувување на мирот.