Следниот мандат за формирање влада бугарскиот претседател Румен Радев ќе го предаде на партијата Движење за права и слободи (ДПС), која е втора според бројот на освоени гласови на предвремените парламентарни избори во Бугарија одржани минатиот месец
По тричасовна расправа во бугарскиот парламент, пратениците го одбија предлогот за формирање нова влада на чело со Росен Желјасков, кој беше предложен за нов премиер од коалицијата ГЕРБ-СДС.
Предложениот владин состав доби поддршка од 98 пратеници, 138 гласаа „против“, а двајца „воздржано“.
Коалициајта ГЕРБ-СДС, која освои најмногу гласови на изборите во јуни, има 68 пратеници во Народното собрание на Бугарија од вкупно 240 пратенички места. Сите 68 пратеници гласаа „за“. Предложениот владин состав на чело со Желјасков го поддржаа и 30 пратеници од Движењето за права и слободи (ДПС). Четиринаесет пратеници од ДПС не го поддржаа предлогот, а еден гласаше „воздржано“.
„Одлуката за избор на премиер не е донесена и со тоа е исцрпена уставната процедура во врска со претседателскиот указ за избор на премиер“,
рече претседателката на Народното собрание на Бугарија, Раја Назарјан, и ја затвори седницата.
Денешното гласање уследи откако бугарскиот претседател Румен Радев во понеделникот му го врачи мандатот за состав на нова влада на мандатарот Росен Желјасков од коалицијата ГЕРБ-СДС, која освои најмногу гласови на последните предвремени парламентарни избори во Бугарија.
Следниот мандат за формирање влада Радев ќе го предаде на партијата Движење за права и слободи (ДПС), која е втора според бројот на освоени гласови на предвремените избори во Бугарија одржани минатиот месец.