Меѓу приоритетните проекти е изградбата на новиот граничен премин „Клепало“ помеѓу општините Берово и Струмјани
Триесет милиони евра, пари обезбедени од Европската Унија, ќе бидат инвестирани во развојот на пограничните региони на Бугарија и Македонија во следните 7 години.
Средствата се во рамките на Програмата за прекугранична соработка „Интеррег“, со која управува бугарското Министерството за регионален развој и јавни работи. Заменик-министерот Захари Христов вели дека инвестициите ќе бидат насочени кон развој на чиста и зелена околина, одржлив туризам и поддршка на конкурентноста во пограничниот регион.
Меѓу приоритетните проекти е изградбата на новиот граничен премин „Клепало“ помеѓу општините Струмјани и Берово.
Бугарскиот министер вели дека благодарение на програмата „Интеррег“, во последните 20 години е обновен изгледот на пограничните населени места на двете земји. Обезбеден е соодветен пристап до природните знаменитости, обновени се античките тврдини и цркви, а помогнати се и локалните културни, образовни и спортски центри да развијат активни содржини. Според него, она што досега е направено придонело за позитивна промена во односите меѓу двата народа.