„Ваквите удари покажуваат дека целите на Русија не се променети. Затоа, од клучно значење е да продолжиме да даваме сè од себе за да ги заштитиме животите, да ја зајакнеме нашата воздушна одбрана и да ги зголемиме санкциите против Русија“, објави украинскиот претседател Зеленски
Бројот на загинати во синоќешниот руски напад со ракети и дронови врз регионите Харков и Доњецк во Украина се искачи на најмалку 14 лица, додека некои светски агенции јавуваат за неофицијална бројка од 20 загинати. Се јавува и за 37 повредени, меѓу кои пет деца.
Меѓу загинатите се најмалку 11 лица кои настрадале при нападот врз градот Добропилија во источна Украина во текот на ноќта, соопшти украинското Министерство за внатрешни работи. Оттаму додаваат дека најмалку тројца се убиени во напад со беспилотно летало во областа Харков на североистокот.
Министерството објави дека руските сили ја нападнале Добропилија со балистички проектили, ракети и безпилотни летала, при што биле оштетени осум згради и 30 автомобили.
„За време на гаснењето на пожарот окупаторите повторно нападнаа при што го оштетија противпожарното возило“,
објави Министерството на социјалната мрежа Телеграм.
Министерството објави и фотографии од делумно уништени згради зафатени од пожар и спасувачи кои отстрануваат урнатини од зградите.
„Ваквите удари покажуваат дека целите на Русија не се променети. Затоа, од клучно значење е да продолжиме да даваме сè од себе за да ги заштитиме животите, да ја зајакнеме нашата воздушна одбрана и да ги зголемиме санкциите против Русија. Сè што му помага на Путин да ја финансира војната мора да пропадне“,
напиша украинскиот претседател Володимир Зеленски на Фејсбук.
Добропилија, која беше дом на околу 28 000 луѓе пред војната, се наоѓа во областа Доњецк во источна Украина, на 22 километри од линијата на фронтот северно од клучниот центар на Покровск, кој со недели е под напад на руските војници.