Бројот на загинати од ерупцијата на вулканот Семеру во Индонезија од 15 се искачи на 22 лица
Најмалку 22 луѓе загинаа, а 27 сè уште се водат како исчезнати по ерупцијата на вулканот Семеру во Индонезија која се случи викендов, соопшти денеска Агенцијата за управување со катастрофи на земјата.
Според Националната агенција за управување со катастрофи, повеќето од жртвите починале откако биле погодени од врели вулкански остатоци за време на ерупцијата во саботата, а многумина изгореле до непрепознатливост, соопштува Агенцијата. Најмалку 68 луѓе, пак, се здобиле со изгореници предизвикани од врели вулкански материјали, соопштија локалните власти.
Индонезискиот претседател Џоко Видодо, кој денеска го посети местото на ерупцијата, рече дека околу 2 000 семејства треба да се преселат откако нивните домови биле уништени.
„Треба да одлучиме каде ќе се преселат и веднаш да изградиме нови домови за нив“,
рече тој.
Речиси 2 000 луѓе беа принудени да ги напуштат своите домови поради катастрофата. Тие добија привремено засолниште во џамии и владини канцеларии, меѓу другите локации, соопшти Агенцијата.