Вулканот Семеру во Индонезија продолжува да исфрла големи количества пепел откако во саботата имаше силна ерупција во која загинаа најмалку 15 луѓе додека потрагата по 27-те исчезнати е отежната поради лошите временски услови, известува индонезиската Агенција за управување со катастрофи.
Највисоката планина на островот Јава силно еруптираше во саботата, исфрлајќи огромно количество пепел во небото над околните села при што усмрти најмалку 15 лица. Потоците од лава по ерупцијата уништија мост што поврзува два региона во блиската област Лумајанг со градот Маланг, што ги отежнува спасувачките напори.
Вулканот повторно еруптираше изутринава, потврди на Твитер индонезискиот Центар за вулканологија и геологија (ПВМБГ), предупредувајќи на континуирана сеизмичка активност.
„Семеру е еден од најактивните вулкани во Индонезија. Како и пред, така и по ерупцијата на 4 декември тој ќе продолжи со својата активност“,
изјави Лисванто, шеф на опсерваторијата на вулканот Семеру.
EPA-EFE/AMMAR
Тим за третман на трауми е испратен на терен за да им помогне на децата погодени од ерупцијата, објави Си-eн-eн Индонезија, а во областа се испратени стотици пакети со помош, вклучувајќи ориз, ќебиња, облека и други основни потреби.
Семеру е еден од повеќе од 100-те активни вулкани во Индонезија, земја која се протега низ Огнениот Прстен на Тихиот Океан, област со висока сеизмичка активност.